LAÇINLILAR SOYQIRIMI QURBANLARININ XATİRƏSİNİ YAD ETMİŞLƏR
Taxtakörpü, 30 mart (AZƏRTAC). Laçın Rayon İcra Hakimiyyətinin yerləşdiyi Ağcabədi rayonunun Taxtakörpü qəsəbəsində 31 mart - Azərbaycanlıların soyqırımı günü ilə əlaqədar ümumrayon anma mərasimi keçirilmişdir.
Mərasim iştirakçıları əvvəlcə Qarabağ müharibəsində şəhid olmuş laçınlıların xatirəsinə ucaldılmış abidə kompleksinin önünə gül-çiçək qoymuşlar.
Rayon icra hakimiyyətinin akt zalında keçirilən anma mərasimində çıxış edən rayon icra hakimiyyətinin başçısı Ramiz Cəbrayılov XX əsrin əvvəllərində cərəyan edən ictimai-siyasi proseslər, Qafqazda erməni daşnakları tərəfindən törədilmiş soyqırımlar haqqında danışmışdır.
Rayon icra hakimiyyəti başçısının müavini İlham Quliyev ermənilərin “Dənizdən-dənizə böyük Ermənistan” yaratmaq məqsədi ilə törətdikləri terror aktları, azərbaycanlılara qarşı keçirdikləri soyqırımı siyasətindən bəhs etmişdir. Bildirilmişdir ki, ermənilərin zaman-zaman xalqımıza qarşı törətdiyi faciələrdən dünya ictimaiyyəti xəbərsiz qalmışdır. Yalnız ulu öndər Heydər Əliyev yenidən hakimiyyətə gəldikdən sonra bu faciələr dünya ictimaiyyətinə çatdırılmış, Prezidentin 1998-ci il 26 mart tarixli Fərmanı ilə hər il martın 31-i Azərbaycanlıların soyqırımı günü kimi qeyd olunur.
Mərasimdə çıxış edənlər erməni faşizmini lənətləmiş, törədilmiş faciələrdən danışmışlar. Laçınlı məcburi köçkünlər çıxışlarında bildirmişlər ki, Prezident İlham Əliyevin apardığı siyasət nəticəsində ölkəmiz qüdrətlənmiş, beynəlxalq aləmdə nüfuzu artmışdır və yaxın vaxtlarda erməni məkrinə, şovinizminə, separatizminə birdəfəlik son qoyulacaqdır.
Bölmənin digər xəbərləri
