LƏNKƏRANLILAR XOCALI FACİƏSİ QURBANLARININ XATİRƏSİNİ EHTİRAMLA YAD ETMİŞLƏR
Lənkəran, 26 fevral (AZƏRTAC). Lənkəran şəhərindəki “Azərbaycanlıların soyqırımı” abidə-kompleksinin önündə Xocalı faciəsinin 17-ci ildönümünə həsr olunmuş anma mərasimi keçirilmişdir.
Lənkəran şəhər İcra hakimiyyətinin başçısı Süleyman Mikayılov, rayonun rəhbər işçiləri, yaşlı nəslin və gənclərin nümayəndələri, idarə, müəssisə və təşkilatların, ictimaiyyətin təmsilçiləri abidənin önünə gül dəstələri düzərək faciə qurbanlarının xatirəsini ehtiramla yad etmişlər. Burada şəhidlərin ruhuna dualar oxunmuşdur.
Həmin gün Lənkəran Özəl Türk Liseyində Xocalı soyqırımı ilə bağlı cənub bölgəsinin şagirdləri arasında keçirilən inşa, şeir və rəsm müsabiqəsinə yekun vurulmuşdur.
Şəhər İcra hakimiyyəti, rayon təhsil şöbəsi və Türk liseyinin birgə keçirdiyi müsabiqədə bölgənin 100-dən artıq məktəblisi iştirak etmişdir.
Münsiflər heyətinin qərarı ilə müsabiqənin 15 qalibi müəyyən edilmiş və onlara diplomlar, xatirə hədiyyələri təqdim edilmişdir.
Bölmənin digər xəbərləri
