Levan Jorjoliani: Gürcüstan-Azərbaycan münasibətləri nümunəvidir
Tbilisi, 21 noyabr, AZƏRTAC
Bu gün Gürcüstan ilə Azərbaycan arasındakı münasibətlər nümunəvidir. Biz bütün sahələrdə, o cümlədən, sərhəd keçid məntəqələrində, gömrük sahəsində çox yaxşı əməkdaşlıq edirik. Gürcüstan və Azərbaycan gömrük sərhəd keçid məntəqələrində işlər yüksək səviyyədə təşkil olunub.
AZƏRTAC xəbər verir ki, bu sözləri Gürcüstan hökumətinin aparat rəhbəri Levan Jorjoliani İctimai televiziyanın "Biznes tərəfdaşı" proqramında deyib.
Aparat rəhbəri bildirib ki, Gürcüstanın Ermənistanla münasibətləri də çox yüksək səviyyədədir.
Onun sözlərinə görə, ABŞ Dövlət Departamentinin nümayəndəsi Gürcüstan gömrüyünün iş prosesini yaxından öyrənmək üçün bölgələrdə olub. Onlar Gürcüstan gömrüyünün iş prinsipini müsbət qiymətləndiriblər.
“Dövlət Departamentinin nümayəndəsi Sadaxlo gömrüyündə olub, orada hansı texnologiyaların tətbiq edildiyini, necə təlim keçmiş kadrların olduğunu görüb və bizdən xahiş edib ki, öz təcrübəmizi erməni həmkarlarımızla bölüşək. Bu yaxınlarda Ermənistan hökumətinin bir çox nümayəndəsi Gürcüstana səfər edib və gömrük məsələləri ilə bağlı səmərəli söhbətlərimiz olub” - deyə L.Jorjoliani vurğulayıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
