LİTVANIN MƏRKƏZİ SEÇKİ KOMİSSİYASI PAKSASIN PREZİDENTLİYƏ NAMİZƏDLİYİNİ QEYDƏ ALMAYACAQ

06.05.2004 [11:51]
Çap et
A⁺ A^-

AZƏRTAC-ın İTAR-TASS agentliyindən aldığı xəbərə görə, Litvanın Mərkəzi Seçki Komissiyası (MSK) sabiq ölkə başçısı Rolandas Paksasın növbədənkənar prezident seçkilərində iştirak etmək üçün namizədliyini qeydə ala bilməyəcəkdir. Bunu MSK-nın sədri Zenonas Bayqauskas açıqlamışdır.

Onun sözlərinə görə, buna mayın 4-də Seymdə prezident seçkiləri haqqında qanuna düşəlişlər edilməsi səbəb olmuşdur. Həmin düzəlişlər impiçment nəticəsində hakimiyyətdən uzaqlaşdırılmış ölkə başçısının ali dövlət vəzifəsinə yenidən seçilməsini qadağan edir. Bu qanunvericilik aktı mayın 5-də qüvvəyə minmişdir.

Bayqauskas demişdir ki, Paksasın namizədliyinin qeydə alınması rədd edilərsə, o, Konstitusiya məhkəməsinin hökmünü almaqla MSK-nın bu qərarından Ali inzibati məhkəməyə şikayət verə bilər.

Litvada növbədənkənar Prezident seçkiləri iyunun 13-də keçiriləcəkdir.