Liviya Baş nazirinin evi qumbaraatanla atəşə tutulub
Bakı, 1 aprel, AZƏRTAC
Bazar ertəsi günü gecə saatlarında Liviyanın Baş naziri Əbdül Həmid Dbeybanın Tripolidəki evinə tank əleyhinə qumbaraatanla azı iki dəfə atəş açılıb.
AZƏRTAC EFE agentliyinə istinadla xəbər verir ki, Baş nazirin evini mühafizə edən hərbi bölmə atəş açılan əraziyə yubanmadan hərbi texnika göndərib. Hadisə nəticəsində ölən və yaralananlar olub-olmadığı barədə məlumat verilmir.
Qeyd edək ki, Əbdül Həmid Dbeyba Liviyanın BMT tərəfindən tanınan milli birlik hökumətinə rəhbərlik edir.
Liviyada uzun müddətdir iki paralel icra orqanı fəaliyyət göstərir. Onlardan biri Tripolidəki milli birlik hökuməti, digəri isə ölkənin şərqində Xəlifə Haftarın rəhbərlik etdiyi Liviya milli ordusudur. Tərəflər arasında 2014-cü ildən bəri davam edən toqquşmalar minlərlə insanın həyatına son qoyub.
Bölmənin digər xəbərləri
