LONDON AZƏRBAYCAN CƏMİYYƏTİ BEYNƏLXALQ İCTİMAİYYƏTİ XOCALI FACİƏSİ HAQQINDA MƏLUMATLANDIRIR
AZƏRTAC xəbər verir ki, Böyük Britaniyada fəaliyyət göstərən London Azərbaycan Cəmiyyəti Xocalı faciəsinin 16-cı ildönümü ilə əlaqədar beynəlxalq ictimaiyyəti məlumatlandırma kampaniya keçirmişdir.
Cəmiyyət kampaniya çərçivəsində Birləşmiş Krallığın xarici işlər naziri Devid Milibanda, Britaniya parlamenti icmalar Palatasının 646 üzvünə, Böyük Britaniyadan Avropa Parlamentinə seçilmiş 78 deputata, Avropa Şurası Parlament Assambleyasındakı milli nümayəndə heyətlərinin rəhbərlərinə, nüfuzlu “The Washington Post”, “The İndependent”, “The Sunday Times”, “The Washington Times”, “The New York Times”, “The Age”, “The Newsweek”, “The Boston Globe” mətbuat orqanlarına, eləcə də BMT-nin İnsan Haqları üzrə ali komissarına, ATƏT Parlament Assambleyasının sədrinə, qurumun Demokratik Təsisatlar və İnsan Haqları Bürosunun rəhbərinə, “Amnesty İnternational”, “Human Rights Watch” təşkilatlarına, Bakıda fəaliyyət göstərən xarici ölkə səfirliklərinə müraciət ünvanlamışdır. Müraciətə cəmiyyət tərəfindən nəşr edilmiş “Khojaly Tragedy - an International View” (“Xocalı faciəsi - beynəlxalq baxış”) və “İnternational Visions: Armenia-Azerbaijan conflict over Karabakh” (“Ermənistan-Azərbaycan, Qarabağ münaqişəsinə beynəlxalq baxışlar”) kitabları əlavə edilmişdir.
Müraciətdə London Azərbaycan Cəmiyyətinin sədri Tale Heydərov 16 il bundan əvvəl Xocalı şəhərində törədilmiş dəhşətləri bir daha diqqətə çatdırmış, bu soyqırımı aktının müasir dövrün ən mənfur cinayətlərindən biri olduğunu bildirmişdir.
Diqqətə çatdırılmışdır ki, Xocalıda baş vermiş qanlı hadisələrlə İnsan Hüquqları haqqında Cenevrə Konvensiyalarının müddəaları kobud şəkildə pozulmuşdur. Xocalı qətliamı yalnız Azərbaycan xalqının deyil, bütün bəşəriyyətin faciəsidir və belə halların beynəlxalq ictimaiyyətin qınaq hədəfinə çevrilməsi gələcəkdə də dünyada münaqişə tərəflərini belə qəddarlıqlardan çəkinməyə, öz hərəkətləri üçün məsuliyyət daşımağa, beynəlxalq hüququn norma və prinsiplərinə əməl etməyə vadar edər.
Tale Heydərov beynəlxalq ictimaiyyəti Xocalı faciəsini insanlığa qarşı cinayət kimi pisləməyə və işğal olunmuş Azərbaycan torpaqlarını azad etmək üçün Ermənistan dövlətinə təzyiqləri artırmağa çağırmışdır.
“Khojaly tragedy - an İnternational View” kitabında faciə barəsində dünyanın aparıcı KİV-lərində dərc edilmiş məqalələr, beynəlxalq təşkilatların hesabatları, faciənin şahidi olmuş xarici jurnalistlərin və faciənin sağ qalmış qurbanlarının təəssüratları, zərərçəkmişlərin tibbi müayinələrinin nəticələri, eləcə də faciə yerindən xarici fotoreportyorların çəkdiyi şəkillər toplanmışdır.
“İnternational Visions: Armenia-Azerbaijan conflict over Karabakh” kitabında isə dünyanın tanınmış mütəxəssislərinin Dağlıq Qarabağ münaqişəsi haqqında elmi tədqiqatları yer almışdır. Kitabları nəşr etməkdən məqsəd beynəlxalq ictimaiyyəti Xocalı faciəsi və Qarabağ münaqişəsi haqqında obyektiv və müstəqil mənbələr əsasında məlumatlandırmaq və əsl günahkarın kim olduğunu göstərməkdir. Kampaniya çərçivəsində adı çəkilən kitablar, həmçinin dünyanın 60 kitabxanasına da göndərilmişdir.
Azərbaycanın dünyada tanıdılması məqsədi ilə ingilis dilində “Visions of Azerbaijan” jurnalını nəşr etdirən London Azərbaycan Cəmiyyəti Qarabağ həqiqətlərindən bəhs edən www.karabakh.co.uk internet portalının təsisçisidir.
######
 |
 |
Bölmənin digər xəbərləri
