LONDON POLİSİ İSLAMA NİFRƏTLƏ MÜBARİZƏYƏ HAZIRLAŞIR
AZƏRTAC Müstəqil İslam İnformasiya Agentliyinə istinadla xəbər verir ki, London polisi islama nifrətin yaratdığı vəziyyətlə mübarizə aparmaq üçün müsəlmanları öz sıralarına cəlb etmək niyyətindədir.
Londonun Tauer Hamlets rayon polisinin rəisi bildirmişdir ki, bu aydan başlayaraq, onun tabeliyindəki zabitlər arasında müsəlman superintendant olacaqdır. Bu onunla əlaqədardır ki, islama nifrətdən doğan münasibətin qurbanları polisə inanmadıqlarına görə, bəzən ona müraciət etmirlər. Müsəlmanın yüksək vəzifəyə təyin olunması əhalisinin 40 faizini müsəlmanların təşkil etdiyi Tauer Hamlets rayonunun müsəlman icması ilə polis arasında münasibətləri yaxşılaşdırmağa imkan verəcəkdir.
Son 6 ayda islama nifrətdən doğan hərəkətlərlə bağlı cəmi 11 şikayət ərizəsi daxil olmuşdur. Bu isə müsəlmanlara qarşı zorakılıq, məscidlərə hücum, yaxud da dini etiqada görə ayrı-seçkilik formasında törədilən cinayətlərin sayına uyğun gəlmir.
Zərərçəkənlərin ədalət mühakiməsinə nail olmasını asanlaşdırmaq üçün şikayətin yeni formaları tətbiq ediləcəkdir. Belə ki, zorakılıq qurbanı indi polisə üçüncü şəxs vasitəsilə müraciət edə və ya xüsusi ərizə formasını doldurub poçt vasitəsilə göndərə bilər.
Bölmənin digər xəbərləri
