Lüksemburq parlamentinin qətnaməsı reallığı dərk etməmək acizliyinin göstəricisidir - ŞƏRH
Bakı, 22 noyabr, AZƏRTAC
Beynəlxalq birliyin Bakıda planetin üzləşdiyi ən ağrılı problemlərdən olan iqlim dəyişikliyinin nəticələri ilə mübarizəyə dair aktual məsələləri müzakirə etdiyi bir vaxtda Lüksemburq Deputatlar Palatasının noyabrın 20-də Azərbaycanı əsassız ittihamlarla hədəfə alan qətnamə qəbul etməsi bu parlamentin reallıq hissini necə itirməsinə bariz nümunədir. Bakı iqlim platformasında 196 dövlət bəşəriyyətin gələcəyinin xilasına yönəlik məsələlərlə məşğuldur. Aktual dünya siyasətinin reallığından uzaq düşmüş Lüksemburq parlamentariləri isə məhz bu qlobal tədbirdə ev sahibliyi edən ölkəni - Azərbaycanı yenidən şantaj etməklə məşğuldur.
AZƏRTAC xəbər verir ki, bu fikirləri Milli Məclisin deputatı, siyasi elmlər doktoru Rizvan Nəbiyev səsləndirib.
O qeyd edib ki, dövlətimizin başçısının COP29-un Liderlər Sammitinin açılış mərasimində və inkişaf etməkdə olan kiçik ada dövlətlərinin Sammitində çıxışlarında səsləndirdiyi haqlı və cəsarətli fikirlərindən sonra qətnamədə Azərbaycan Prezidentinin hədəfə alınması təəccüb doğurmur. Əksinə, bu, faktlar qarşısında aciz qalanların cılızlıq nümayişidir. Müstəmləkəçilikdən əziyyət çəkən xalqların haqq səsinin Azərbaycan Prezidenti tərəfindən belə mötəbər kürsüdən təkzibolunmaz faktlar əsasında səsləndirilməsi təbii ki, bu işə məsuliyyət daşıyanları çox ciddi narahat edir. Neomüstəmləkəçi qüvvələrin əlində alətə çevrilərək Azərbaycana qarşı aparılan qarayaxma kampaniyasının tərkibi olmaq əvəzinə, bu xalqların yanında olmaq Lüksemburq parlamentinə daha çox hörmət gətirərdi. Bu, təkcə ədalətin dəstəklənməsi deyil, həm də beynəlxalq hüquqa hörmətin nümayişi olardı.
“Ölkəmizə qarşı uzun illərdir qarayaxma kampaniyası aparan müxtəlif maraq qruplarının istifadə etdikləri ayrı-ayrı mövzuların yenidən ittihamlar və tələblər formasında Lüksemburq parlamentinin qətnaməsində yer alması ölkəmizin daxili işlərinə kobud müdaxilə cəhdidir.
Azərbaycanda hüquqi dövlətçiliyin inkişafına qarşı yönələn absurd ittihamlara ən tutarlı cavab yenə COP29 nümunəsindən götürülə bilər. Azərbaycanın “COP atəşkəsi” təşəbbüsünə 1200-dən çox təsisat, qeyri-hökuməti təşkilat nümayəndələrinin, nüfuzlu şəxsiyyətlərin qoşulması həm də ölkəmizdə vətəndaş cəmiyyətinin uğurlu inkişafının təqdir edilməsidir. Qlobal miqyasda və bütün coğrafi məkanlardan minlərlə təsisatı təmsil edən on minlərlə insanın ölkəmizdə fəaliyyəti bu absurd ittihamlara ən tutarlı cavabdır”, - deyə o əlavə edib.
Deputat vurğulayıb ki, Lüksemburq parlamentinin qətnaməsi, eyni zamanda, Azərbaycanın suverenliyinə hörmətsizlik nümayişdir. Azərbaycanın ərazilərinin Ermənistan tərəfindən beynəlxalq hüquqa zidd 30 illik işğalına son qoymasından sonra bölgədə yaranan və beynəlxalq hüquqa əsaslanan yeni reallıqları Lüksemburq parlamenti dərk etməkdə hələ də çətinlik çəkir. Otuz il müddətində Ermənistan tərəfindən pozulan və Lüksemburq tərəfindən heç vaxt gündəmə gətirilməmiş beynəlxalq hüququn prinsipləri məhz Azərbaycan Prezidentinin uğurlu hərbi-siyasi və diplomatik kursu nəticəsində bərpa edildi, regionda sabitlik, uzunmüddətli sülhün təmini üçün unikal tarixi şərait yarandı.
Barbar erməni işğalının nəticələrindən biri də Azərbaycanın ərazisinin 12 faizinin 1,5 milyon mina və digər partlamamış hərbi sursatla çirkləndirilməsidir. BMT Təhlükəsizlik Şurasının 1993-cü il tarixli qətnamələrində də yer almış, işğal edilmiş ərazilərdən güc tətbiq edilərək qovulan və iztirablar yaşamış yüz minlərlə azərbaycanlı həm də bu səbəbdən həmin torpaqlara bu gün geri qayıda bilmir. Bu insanların haqları isə lüksemburqlu parlamentariləri heç vaxt düşündürməyib.
“Parlamentarilərin məlumatsız olduqları məsələlərə dair ədalətsiz və qərəzli mövqe sərgiləmək əvəzinə, regionu məşğul edən real məsələlərin həllinə dəstək verməsi Lüksemburq parlamentinə hörmət qazandırar. Ermənipərəst və Azərbaycana qarşı qərəzli mövqeni öz həyat amili hesab edən qüvvələrin aləti kimi istifadə olunması region xalqlarının rifahına, inkişafına və sabitliyin təmininə xidmət etmir.
Lüksemburq parlamentinin reallıqların təhrif olunduğu birtərəfli qətnaməsini qəti şəkildə rədd edir, lüksemburqlu həmkarları obyektiv və ədalətli mövqe nümayiş etdirməyə çağırıram”, - deyə o əlavə edib.
Bölmənin digər xəbərləri
