“Maarifçi” tələbə-məzun təcrübə proqramının imtahan mərhələsinin vaxtı açıqlanıb
Bakı, 23 yanvar, AZƏRTAC
Yanvarın 28-də “Maarifçi” tələbə-məzun təcrübə proqramının imtahan mərhələsi keçiriləcək.
Elm və Təhsil Nazirliyindən AZƏRTAC-a bildirilib ki, proqram üzrə imtahanın ilk mərhələsi test formatında keçiriləcək. İştirakçılara testin keçirilmə vaxtı və yeri barədə məlumat SMS vasitəsilə göndəriləcək.
İmtahanın test mərhələsində yüksək bal toplayan 100 nəfər müsahibəyə dəvət olunacaq.
Test imtahanı mərhələsində informatika, məntiq və dünyagörüşünü yoxlayan test sualları təqdim ediləcək.
Dünyagörüşü başlığı altında namizədin Azərbaycan dili, Azərbaycan tarixi, Azərbaycan mədəniyyəti biliklərini yoxlayan suallar təqdim olunacaq. Bundan əlavə yumşaq bacarıqları yoxlayan suallar da testdə öz əksini tapacaqdır.
Qeyd edək ki, təcrübə proqramına ümumilikdə 1958 nəfərin müraciəti qeydə alınıb. İlkin yoxlama zamanı 690 müraciət imtahan mərhələsi üçün uyğun hesab olunub.
Bölmənin digər xəbərləri
