Malayziya məhkəməsi sabiq Baş nazirin həyat yoldaşını rüşvət almaqda təqsirli bilib
Tokio, 18 fevral, AZƏRTAC
Fevralın 18-də Malayziyanın yüksək səviyyəli paytaxt məhkəməsi sabiq Baş nazir Nacib Razakın həyat yoldaşı Rozma Mansuru rüşvət almaqda təqsirli bilərək, vəkillərin onun müdafiəsi üçün çıxış etməsinə icazə verib.
AZƏRTAC Malayziya KİV-lərinə istinadla xəbər verir ki, bu barədə məhkəmənin hakimi Mohammad Zayni Mazlan bəyan edib.
Malayziya hüquq-mühafizə orqanları 2016-cı ildə - Rozma Mansurun həyat yoldaşı Nacib Razak baş nazir vəzifəsində olarkən onun Saravak ştatındakı bir neçə yüz məktəbdə hibrid və dizel enerji mənbələrinin quraşdırılması barədə tenderdə qalib gəlmək üçün “Jepak Holdings” şirkətinin rəhbərliyindən 187 milyon rinqit (təqribən 46,3 milyon dollar) rüşvət aldığını müəyyən edib. Layihənin ümumi dəyəri 1,2 milyard rinqit (297,2 milyon dollar) təşkil edib. R.Mansur bundan əlavə, 6,5 milyon renqit (1,6 milyon dollar) məbləğində rüşvət almaqda da təqsirli bilinir. Təqsiri sübuta yetiriləcəyi təqdirdə R.Mansuru 20 il müddətə azadlıqdan məhrumetmə və dəyən zərərin beş misli qədər təzminat ödəmə cəzası gözləyir.
Xatırladaq ki, Malayziyanın sabiq Baş naziri Nacib Razakın qanunazidd əməlləri barədə cinayət işinin istintaqına onun rəhbərlik etdiyi partiyanın 2018-ci ilin mayında keçirilən parlament seçkilərində məğlubiyyətindən dərhal sonra başlanıb. Səsvermənin nəticələrinin məlum olmasından bir neçə gün sonra hökumətin sabiq başçısı və onun ailə üzvləri ölkəni tərk etməyə cəhd göstərsələr də, paytaxt aeroportunda həbs olunublar.
Ötən ilin iyulunda N.Razak “SRC International” dövlət investisiya fondunda törətdiyi iqtisadi cinayətlərə görə 12 il müddətinə azadlıqdan məhrum edilib. Ali Məhkəmə, həmçinin onun 210 milyon rinqit (52 milyon dollar) cərimə ödəməsi barədə qərar qəbul edib.
N.Razakın vəkillərinin 1 milyon rinqit (247 min dollar) məbləğində girov qoyması müqabilində apelyasiya şikayətinə baxılanadək onun azadlıqda qalmasına icazə verilib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
