Malik Həsənov: Azərbaycan tarixi Zəfəri ilə bölgəyə sülh, sabitlik, təhlükəsizlik gətirib
Bakı, 15 noyabr, AZƏRTAC
Türkdilli Ölkələrin Dövlət Başçıları Şurası Türkiyə Prezidenti Rəcəb Tayyib Ərdoğanın təklifi ilə Prezident, Müzəffər Ali Baş Komandan İlham Əliyevin “Türk Dünyasının Ali Ordeni” ilə təltif olunması haqqında Qərar qəbul etdi. Bu Qərar dövlətimizin başçısı İlham Əliyevin rəhbərliyi ilə Azərbaycanın ərazi bütövlüyünün bərpasına, türk birliyinə mühüm töhfə verməsinə və bölgədə davamlı sülhün, sabitliyin əldə olunmasına yol açan tarixi Qələbəmizə əsaslanır. Mükafat bir daha Azərbaycan-Türkiyə dostluğunun, qardaşlığının sarsılmazlığını nümayiş etdirdi. Prezident İlham Əliyev Türkdilli Dövlətlərin Əməkdaşlıq Şurasının VIII Zirvə Görüşündəki çıxışında mükafatın böyük şərəf, eyni zamanda, məsuliyyət olduğunu önə çəkərək bu məqamı da xüsusi qeyd etdi ki, onun sevincini ikiqat edən bu Ali Ordenin Türk Şurasına üzv ölkələrin imzası və Prezident Rəcəb Tayyib Ərdoğanın təşəbbüsü ilə verilməsidir. Dövlətimizin başçısının qeyd olunan çıxışı həm Azərbaycan-Türkiyə dostluğuna, həm türk dünyasının birliyinə, həm də 44 gündə 30 illik işğala son qoyan Zəfərimizə bir baxış oldu. Türkiyə Prezidenti Rəcəb Tayyib Ərdoğan Azərbaycan Prezidenti İlham Əliyevə “Türk Dünyasının Ali Ordeni”ni təqdim edərkən bildirdi ki, 30 il davam edən işğala 44 gündə son qoyulması təkcə azərbaycanlılar deyil, bütün türk dünyası üçün böyük əhəmiyyət daşıyır. İllərdir tətbiq olunmayan BMT Təhlükəsizlik Şurasının qətnamələri Vətən müharibəsi nəticəsində yerinə yetirildi. Azərbaycan bununla beynəlxalq ictimaiyyətin yaddaşına ədalət mesajını həkk etdi. Azərbaycanın ərazi bütövlüyünü təmin etməsi türk dünyasının birliyini və bərabərliyini möhkəmləndirir. Bu reallığı özündə əks etdirən fikirlərin fonunda Azərbaycanın tarixi Zəfərinin bu günümüz və gələcəyimiz üçün əhəmiyyəti daha aydın görünür. Bir sözlə, təsdiqlənir ki, Prezident İlham Əliyev türk dünyasında uzaqgörən, məqsədyönlü, prinsipial Lider kimi şöhrət qazanıb.
AZƏRTAC xəbər verir ki, bu fikirləri Milli Məclisin deputatı Malik Həsənov ifadə edib.
M.Həsənov dövlətimizin başçısı İlham Əliyevin hələ 2009-cu ildə Türkdilli Ölkələrin Dövlət Başçılarının Naxçıvan Zirvə Görüşündə səsləndirdiyi “Vaxtilə Azərbaycanın tarixi torpağı, əzəli torpağı Zəngəzur bölgəsini Azərbaycandan ayırıb Ermənistana birləşdirilməsi demək olar ki, böyük türk dünyasını coğrafi baxımdan parçaladı. Yəni türk dünyasının vahid bir ailə kimi, vahid bir qüvvə kimi fəaliyyəti on illiklər ərzində dayandırılmışdır” fikrini xatırladaraq qeyd edib ki, bu gün böyük fəxrlə, qürur hissi ilə türk dünyasının birlik arzusunun reallığa çevrilməsində Prezident İlham Əliyevin xidmətlərindən, töhfələrindən bəhs edirik. Hazırda Zəngəzur dəhlizinin yaradılması təkcə iqtisadi deyil, həm də böyük siyasi əhəmiyyət daşıyan hadisədir. Türkdilli dövlətlər arasında coğrafi bağlılıq bərpa edilir. Prezident İlham Əliyev daim bəyan edir ki, gücümüz birliyimizdədir. Hər bir ölkənin problemi digərinin problemi kimi qəbul olunmalı, həlli istiqamətində birgə səylər göstərilməli, addımlar atılmalıdır.
“Tarixi Zəfərimizin yaratdığı reallıqlar birliyimizi daha da möhkəmləndirəcək”, - söyləyən deputat vurğulayıb ki, dövlətimizin başçısı İlham Əliyevin çıxışında qeyd etdiyi kimi, bu gün türk dövlətləri arasındakı birlikdən danışarkən gələcəyə baxırıq. Çünki birgə gələcəyimiz üçün çox möhkəm zəmin, təməl var. Bu, ortaq köklərimiz, dilimiz, dinimiz və maraqlarımızdır.
Azərbaycanın Türkdilli Dövlətlərin Əməkdaşlıq Şurasına sədrlik etdiyi 2019-2021-ci illərdə türkdilli dövlətlər və xalqlar arasında dostluğun, qardaşlığın və əməkdaşlığın daha da möhkəmləndirilməsi istiqamətində göstərdiyi səylərdən, əldə olunan müsbət nəticələrdən geniş bəhs edən M.Həsənov diqqəti dünyanı cənginə almış koronavirus infeksiyası ilə mübarizə tədbirlərinin gücləndirildiyi bir zamanda Prezident İlham Əliyevin qlobal problemin həlli üçün birgə addımların atılmasına böyük ehtiyacın olduğunu bildirərək əvvəlcə türk aləminin, sonra ümumilikdə bütün dünyanın bir araya gəlməsinə xidmət edən təşəbbüslərinə yönəldib. O deyib: “Prezident İlham Əliyevin təşəbbüsü ilə Türkdilli Dövlətlərin Əməkdaşlıq Şurasının COVID-19-a həsr olunan Zirvə Görüşü keçirildi. Belə addımlar təsdiqləyir ki, Türk Şurası dostluq və qardaşlıq təməlləri əsasında qurulub. Azərbaycanın təşkilata sədrliyi qardaş Türkiyəyə təhvil verməsi bundan sonra türk dünyasının birliyinə xidmət edəcək addımlar barədə aydın təsəvvür yaradır”.
Deputat Zirvə Görüşündə səsləndirilən fikirlər əsasında bu ümumiləşdirməni aparıb ki, Azərbaycan tarixi Zəfəri ilə bölgəyə sülh, sabitlik, təhlükəsizlik gətirib. Öz işğalçılıq siyasətinə görə məğlub vəziyyətdə olan Ermənistan gec-tez anlayacaq ki, heç bir ölkəyə ərazi iddiası onlara xeyir gətirməyəcək. Yaxın gələcəkdə Ermənistan həm Türkiyəyə, həm Azərbaycana qarşı ərazi iddialarına son qoymalıdır, əks təqdirdə, onlar daha da pis duruma düşə bilərlər.
Bölmənin digər xəbərləri
