Mançesterdə sinaqoqa hücumdan sonra küçələrdə yüzlərlə əlavə polis qüvvələri yerləşdirilib
London, 5 oktyabr, AZƏRTAC
Mançesterdə oktyabrın 2-də baş verən sinaqoq hücumundan sonra şəhərin küçələrinə yüzlərlə əlavə polis əməkdaşı cəlb edilib.
AZƏRTAC BBC-yə istinadla xəbər verir ki, Mançester Polis İdarəsinin rəis müavini Kris Sayks bildirib ki, hücumdan sonra Mançester polisi əməkdaşları 12 saatlıq növbələrdə işləyir və onların istirahət günləri ləğv edilib. Bundan əlavə, digər regionlardan da polis qüvvələri Mançesterə göndərilib. Adi polis xidmətindən əlavə, bir çox məhəllədə və şəhər mərkəzində əlavə patrul qrupları yerləşdirilib.
Qeyd edək ki, oktyabrın 2-də Mançesterin Hiton Park sinaqoqunda Yom Kipur mərasimi zamanı terror hücumu baş verib. Hücum zamanı iki yəhudi həyatını itirib. Hücum edən şəxs avtomobili kütlənin üzərinə sürüb. O, daha sonra bıçaqla sinaqoqa girməyə cəhd etsə də, silahlı polis tərəfindən zərərsizləşdirilib. Hücum nəticəsində üç nəfər yaralanıb.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
