Marneulidə insan hüquq və azadlıqlarına həsr olunmuş seminar-görüş keçirilib
Tbilisi, 12 oktyabr, AZƏRTAC
Gürcüstanın Kvemo Kartli bölgəsinin Marneuli rayonunda insan hüquq və azadlıqlarının, xüsusən də milli azlıqların hüquqlarının müdafiəsi sahəsində maarifləndirmə ilə bağlı seminar-görüş keçirilib.
AZƏRTAC xəbər verir ki, tədbirdə Tbilisi, Rustavi, Qardabani, Marneuli, Dmanisi, Bolnisi və digər rayonlardan rəhbər işçilər, QHT rəhbərləri, ictimai fəallar iştirak ediblər.
Gürcüstan Azərbaycanlıları Konqresinin (GAK) və “Şəffaf Qafqaz” təşkilatının birgə təşəbbüsü ilə keçirilən tədbirdə Gürcüstan dövləti nəzdində Hüquqi Yardım Xidmətinin (Mərkəz) də təqdimatı olub.
GAK sədri Hüseyn Yusifov çıxışında bildirib ki, ölkədə insanlara hüquqi yardım göstərilməsi üçün bir sıra layihələr həyata keçirilir. Lakin milli azlıqların bir çoxu bu layihələrdən bəhrələnə bilmir. Xüsusən bölgələrdə insanlara pulsuz hüquqi yardım göstərilməsi sahəsində müəyyən problemlər qalmaqdadır. Xidmətin əsas məqsədi birgə fəaliyyət nəticəsində həmin problemlərin həllinə yardım göstərməkdir.
"Şəffaf Qafqaz" təşkilatının sədri, hüquqşünas Mübariz Qarayev çıxışında bölgədə mövcud olan problemlərin həllində bu cür mərkəzlərin rolundan bəhs edib. Bildirib ki, insanlar arasında maarifləndirmə işlərinin aparılması, onlara pulsuz hüquqi yardım göstərilməsi günün vacib tələblərindən biridir.
Sonra Hüquqi Yardım Xidmətinin rəhbəri David Simonya təşkilatın məqsəd və vəzifələri barədə ətraflı məlumat verib. Bildirib ki, mərkəz dinindən, dilindən asılı olmayaraq bütün insanlara müxtəlif hüquqi xidmətlər göstərəcək. Xidmət əməkdaşları insanlara hüquqi məsləhətlər verəcək, milli azlıqlara dövlət dilində müxtəlif dövlət, yerli özünüidarə orqanlarına müraciət, vəkillik xidməti, əmlak və digər sosial məsələlərin həllinə yardım edəcək.
Onun sözlərinə görə, əsas mərkəzi aparatı Rustavidə yerləşən xidmətin Marneulidə və azərbaycanlıların yığcam yaşadıqları digər bölgələrdə də ofisləri açılacaq.
AZƏRTAC-ın xüsusi müxbiri Xətayi Əzizov Azərbaycanda insan hüquq və azadlıqlarının, xüsusən də qadın və uşaqların, yeniyetmələrin hüquqlarının qorunması, cəmiyyətə inteqrasiyası sahəsində görülən işlər barədə məlumat verib. Bildirib ki, Azərbaycanda bu sahədə dövlət tərəfindən kompleks tədbirlər həyata keçirilir. Orta məktəblərdə ailə və cəmiyyət mövzusunda dərslərin keçirilməsi isə xüsusi əhəmiyyət kəsb edir. O bu sahədə Azərbaycanın təcrübəsinin öyrənilməsini təklif edib.
Sonra tədbirdə mövzu ətrafında çıxışlar olub, Gürcüstanda azyaşlı qızların zorla ərə verilməsi nəticəsində yaranan problemlərdən danışılıb, insanları maraqlandıran məsələlərə aydınlıq gətirilib.
GAK sədri H.Yusifov erkən nikahların, xüsusən də azyaşlı qızların zorla ərə verilməsi məsələlərinin son günlər cəmiyyəti narahat etdiyini vurğulayıb. O, bu cür hallara qarşı, qanunvericiliyin sərtləşdirilməsini, Hüquqi Yardım Xidmətinin bu məsələyə də ciddi yanaşmasının vacibliyini vurğulayıb.
Bildirilib ki, xidmətin əməkdaşları tərəfindən məktəblərdə şagirdlərlə görüşlər keçiriləcək, yeniyetmə və gənclər arasında maarifləndirmə işləri həyata keçiriləcək.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
