Masazırda qanunsuz fəaliyyət göstərən quş kəsimi sexi aşkarlanıb
Bakı, 5 yanvar, AZƏRTAC
Abşeron rayonunun Masazır qəsəbəsi, Ə.Vahid küçəsində fiziki şəxs Vüqar Füzuli oğlu Hacıyevə məxsus quş kəsimi sexində yoxlama aparılıb.
Azərbaycan Qida Təhlükəsizliyi Agentliyinin əməkdaşları tərəfindən yoxlama zamanı müəssisənin sanitar-gigiyenik tələblərə əməl olunmadan qanunsuz fəaliyyət göstərdiyi müəyyən edilib.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, sexdə ev quşlarının baytarlıq tələbləri və heyvan rifahı gözlənilmədən kəsiminin həyata keçirildiyi məlum olub.
Müəssisədə havalandırma sistemi qurulmayıb. Kondensasiya prosesi zamanı yaranmış sular tavandan birbaşa qida məhsullarının üzərinə tökülür. Tüklərin təmizlənməsi, pörtlədilməsi, içalatın təmizlənməsi eyni sahədə həyata keçirilir. İşçilər tibbi müayinəyə cəlb olunmayıb. Alət və ləvazimatların yuyulub təmizlənməsi üçün yuma sahəsi təşkil edilməyib. Kəsimi aparılmış toyuqların baytarlıq ekspertizasından keçirilmədən satışa verildiyi aşkarlanıb.
Müəssisənin fəaliyyətinin dayandırılması barədə məhdudlaşdırıcı qərar qəbul edilib, rəhbəri barəsində inzibati protokol tərtib olunub. Məhsullardan nümunələr götürülərək laborator müayinələrə cəlb edilib.
Linkə keçid edərək videoməlumatla tanış olmaq mümkündür.
Bölmənin digər xəbərləri
