Mehmet Fatih Kacır: Türkiyə raket və peyklərini kosmosa göndərmək üçün çalışır
İstanbul, 13 avqust, AZƏRTAC
Türkiyənin Milli Texnologiya Həmləsində kosmos və kosmik texnologiyalar mühüm yer tutur.
AZƏRTAC xəbər verir ki, bunu Türkiyənin sənaye və texnologiya naziri Mehmet Fatih Kacır bildirib.
Onun sözlərinə görə, Türkiyə BİLSAT, RASAT, GÖKTÜRK-2, Türksat 6A və İMECE peykləri ilə bu sahədə mühüm imkanlar əldə edib. Milli Kosmos Proqramı çərçivəsində isə Türkiyənin Ay aparatının hazırlanması davam edir. Hibrid mühərrik sisteminə malik Ay aparatının 2027-ci ilin əvvəlində kosmosa göndərilməsi planlaşdırılır.
Kacır Türkiyənin kosmosa müstəqil çıxış imkanının strateji hədəf olduğunu vurğulayıb. O bildirib ki, Türkiyə Somalidə kosmodromunu inşa edir. Layihə tamamlandıqdan sonra ölkənin hazırladığı peyk və kosmik aparatları öz kosmodromundan kosmosa göndərməsi hədəflənir.
Nazir, həmçinin Orta Doğu Texniki Universitetində yaradılacaq kosmik texnoparkın şirkət və qurumların, eləcə də tədqiqat və inkişaf fəaliyyətlərinin bir araya gətirildiyi mühüm mərkəz olacağını qeyd edib.
Oktyabrın 5–dən 9-dək Antalyada 77-ci Beynəlxalq Astronavtika Konqresinin keçiriləcəyini xatırladan nazir bildirib ki, tədbirə 100-dən çox ölkədən 10 mindən artıq iştirakçı qatılacaq.
Konqres çərçivəsində ilk dəfə “Antalya Bəyannaməsi”nin qəbul edilməsi planlaşdırılır. Bəyannamənin əsas mesajlarının sülh, etimad və sabitlik, həmçinin kosmosun beynəlxalq əməkdaşlıq və bəşəriyyətə xidmət edən texnologiyaların inkişafı platforması olacağı bildirilir.
Bölmənin digər xəbərləri
