Məktəb tikintisi ilə bağlı dövlət proqramlarında qarşıya qoyulan mühüm vəzifələr artıq reallığa çevrilib
Bakı, 2 fevral, AZƏRTAC
Ölkəmizdə baş verən sürətli iqtisadi inkişaf bütün sosial sahələrin, o cümlədən təhsilin inkişafına əsaslı təkan verib. Dünya standartlarına uyğun inkişaf yolu tutmuş Azərbaycan təhsilinin nüfuzu nəzərəçarpacaq dərəcədə artıb.
Azərbaycan təhsilinin 27 il əvvəlki və indiki vəziyyətinin müqayisəolunmaz şəkildə dəyişdiyini kimsə inkar edə bilməz. Müstəqilliyimizin ilk illərində müharibə şəraitində yaşayan ölkəmiz iqtisadi çətinliklər içində boğulurdu. Xüsusilə təhsil sahəsində vəziyyət ürəkaçan deyildi. Nəinki ucqar kəndlərdə, hətta paytaxtdakı məktəblərdə belə şagirdlərin təhsil almaları üçün lazımi avadanlıq çatmırdı. Sovet dövründən qalma bir çox məktəblərdə adi şərait yox dərəcəsində idi. O illərdə uçuq-sökük məktəblərdə, soyuq sinif otaqlarında keçirilən dərsləri yəqin ki, çoxları xatırlayır. Xalqın təkidli tələbi ilə hakimiyyətə qayıdan ümummilli lider Heydər Əliyevin uzaqgörənliyi və nüfuzu sayəsində beynəlxalq qurumlar Azərbaycana kömək etməyə başladılar. Ulu öndərin siyasi kursunun layiqli davamçısı Prezident İlham Əliyevin diqqət və qayğısı nəticəsində Azərbaycan təhsilində uğurla aparılan islahatları, ümumtəhsil müəssisələrinin maddi-texniki bazasının təkmilləşdirilməsi, təchizat və kadr hazırlığı ilə bağlı görülmüş işləri artıq hər bir azərbaycanlı öz həyatında hiss edir. Ardıcıl şəkildə həyata keçirilən islahatlar bu vacib strateji fəaliyyət sahəsinin inkişafına güclü təkan verib, ölkə təhsilinin qabaqcıl dövlətlərin təhsil sistemlərinə inteqrasiyasına əlverişli şərait yaradıb. Görülən işlər nəticəsində Azərbaycanın ümumtəhsil müəssisələri Avropa standartlarına uyğunlaşdırılır. Fərəh hissi ilə demək olar ki, məktəblərimiz istər infrastrukturuna, istərsə də tədrisin səviyyəsinə görə bir çox ölkələri üstələyir.
Bir sözlə, ölkəmizdə məktəb tikintisi ilə bağlı dövlət proqramlarında qarşıya qoyulan mühüm vəzifələr artıq reallığa çevrilib.
AZƏRTAC xəbər verir ki, Dövlət Statistika Komitəsinin məlumatına görə, təkcə ötən il Naxçıvan Muxtar Respublikasında 1726 şagird yerlik 6 ümumtəhsil məktəb binası, Bakı şəhərində isə 3500 şagird yerlik ümumtəhsil məktəb binası, 200 yerlik məktəbəqədər təhsil müəssisəsi istifadəyə verilib. Bundan əlavə, Şəki şəhərində, Abşeron, Balakən, Qobustan, Sabirabad, Şamaxı və Tovuz rayonlarında 3432 şagird yerlik 7 ümumtəhsil məktəb binası, Yevlax şəhərində, Ağcabədi, Ağdaş, Astara, Bərdə, Biləsuvar, Cəlilabad, Gədəbəy, İmişli, Qəbələ, Qobustan, Oğuz, Lerik, Saatlı, Şəmkir, Tərtər, Tovuz və Zərdab rayonlarında 1530 yerlik 18 məktəbəqədər təhsil müəssisəsi tikilib. Bunlar heç də adi statistik göstəricilər deyil. Bu rəqəmlərin arxasında dövlətin təhsil sahəsində apardığı məqsədyönlü və düşünülmüş siyasəti dayanır. Eyni zamanda, yüz minlərlə müəllim və şagirdin rahatlığı dayanır.
Prezident İlham Əliyev “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının yekunlarına həsr olunan konfransda son 15 ildə 3 min 200-dən çox məktəbin əsaslı təmir edildiyini və ya yenidən tikildiyini diqqətə çatdırıb. Dövlətimizin başçısı bildirib ki, sosial infrastrukturun yaradılması prosesi davam etdiriləcək. 3 min 272 məktəbin tikilməsinə və təmir edilməsinə baxmayaraq, bu göstərici mövcud məktəb fondunun 73 faizi deməkdir. Ancaq təmirə ehtiyacı olan məktəblər var və bu işlər də növbəti dövlət proqramında nəzərdə tutulacaq.
Ölkə başçısının proqram xarakterli bu çıxışı Azərbaycanda təhsilə olan diqqəti göstərməklə yanaşı, həm də təhsilimizin gələcəyinə nikbinliklə baxmağa əsas verir. Xüsusi qeyd etmək lazımdır ki, dövlətimizin başçısının təhsil sahəsində müəyyən etdiyi proqramlar ümumtəhsil müəssisələrinin təmir və bərpasının, onların ən müasir avadanlıqlarla təchiz olunmasının başlıca istiqamətlərini təşkil edir.
Danılmaz faktdır ki, respublikamızda təhsil artıq ümumdövlət işinin tərkib hissəsinə çevrilib. Ölkəmizdə təhsil islahatının uğurla aparılmasını təmin edən mükəmməl normativ-hüquqi bazanın yaradılması, müxtəlif dövlət proqramları və layihələrin gerçəkləşdirilməsi bunun əyani göstəricisidir.
Bölmənin digər xəbərləri
