AZƏRTAC-ın xarici informasiya agentliklərindən aldığı xəbərə görə, Mərakeş kralı VI Məhəmməd vəliəhd Mulay əl-Həsənin doğum günü münasibətilə 49 min məhbusun əfv olunması haqqında fərman vermişdir. Onların arasında 400-dən çox əcnəbi var.

Kral ailəsi üçün bu fərəhli hadisə ilə əlaqədar paytaxt Rabatda toplardan 101 yaylım atəşi açılmışdır. Hələ cümə günü səhər paytaxtın minlərlə sakini Kral sarayı qarşısına toplaşaraq, öz təbriklərini və monarx ailəsinə sadiq qaldıqlarını bildirmişdir.

Mayın 7-də ölkənin bütün şəhərlərində bayram gəzintiləri başlanmışdır. Şəhərlər milli bayraqlarla, kralın və balaca vəliəhdin portretləri ilə bəzədilmişdir. Kralın fərmanı ilə şənliklər səkkiz gün səkkiz gecə davam edəcəkdir.

Ölkənin hakim sülaləsi əslən Ərəbistanın Qırmızı dəniz sahillərində yerləşən Yanbu vadisindəndir. XIII əsrdə onlar köçüb Mərakeşə gəlmiş, XVII əsrin ortalarından isə indiki dövlətin ərazisində hakimiyyət sürürlər. 41 yaşlı VI Məhəmməd Mərakeşin 23-cü hökmdarıdır.