SİYASƏT
MƏRKƏZİ SEÇKİ KOMİSSİYASI MƏTBUAT XİDMƏTİNİN MƏLUMATI
Azərbaycan Respublikası Mərkəzi Seçki Komissiyasının sədri Məzahir Pənahovun başçılıq etdiyi nümayəndə heyəti Böyük Britaniyanın Seçki Rəsmiləri Assosiasiyasının dəvəti ilə fevralın 23-dən martın 1-dək bu ölkədə rəsmi səfərdə olacaqdır.
Nümayəndə heyətinə Mərkəzi Seçki Komissiyasının katibləri Qüdrət Həsənquliyev və Qabil Orucov, Mərkəzi Seçki Komissiyasının üzvü Mehdi Səlimzadə və beynəlxalq əlaqələr şöbəsinin müdiri Rövzət Qasımov daxildirlər. Mərkəzi Seçki Komissiyasının təmsilçiləri Böyük Britaniyanın Seçki Rəsmiləri Assosiasiyasının Harogeyt şəhərində keçiriləcək illik baş məclisində iştirak edəcəklər.
Nümayəndə heyətinin rəhbəri Məzahir Pənahovun səfər proqramı çərçivəsində Böyük Britaniyanın Seçki Komissiyasının sədri cənab Sem Yanqer və Seçki Rəsmiləri Assosiasiyasının sədri cənab Stiv Leyk ilə görüşləri nəzərdə tutulmuşdur.
Seçki Rəsmiləri Assosiasiyası 1987-ci ildən fəaliyyət göstərən qurumdur və Böyük Britaniyanın 1000-dən artıq seçki rəsmilərini öz ətrafında birləşdirir. Bu təşkilat həmçinin bir sıra xarici ölkələrin müvafiq seçki qurumları ilə yaxından əməkdaşlıq edir. Onun xarici ölkələrdən olan üzvləri də vardır.