Metsamor Atom Elektrik Stansiyası qonşu ölkələrin ekologiyasına ciddi zərbə vurur
Strasburq, 24 iyun (AZƏRTAC). Avropa Şurası Parlament Assambleyasının iyun ayının 23-də davam edən iş günündə kiprli deputat Xristos Purquridesin “Milli parlamentlər: Avropada insan hüquqlarının qarantı” adlı məruzəsi dinlənilmişdir. Məruzə ətrafında müzakirələrdə Azərbaycan nümayəndə heyətinin üzvü Aydın Abbasov çıxış etmişdir. İnsan haqlarının universal dəyər kimi Avropa ölkələrinin hüquq sistemlərində prioritet əsaslarla təmin olunduğunu qeyd edən deputat Azərbaycanda da bu sahədə ciddi işlərin görüldüyünü, mükəmməl qanunvericilik bazasının yaradıldığını, Milli Məclisdə və müvafiq komitələrdə yeni qanun layihələrinin müzakirə olunduğunu diqqətə çatdırmışdır. Ətraf mühitin qorunması və sağlam mühitdə yaşamağın insanların sosial hüquqlarının təminatında mühüm əhəmiyyətini qeyd edən A.Abbasov Ermənistan tərəfindən ölkəmizin ekologiyasına ciddi zərər vurulduğunu bildirərək demişdir: 1977-ci ildən istismarda olan və 1988-ci ildə Ermənistanda baş verən zəlzələdən sonra Metsamor Atom Elektrik Stansiyası 1995-ci ildə yenidən işə salınmışdır. Avropa İttifaqı və Beynəlxalq Atom Enerjisi Agentliyinin (BAEA) sözügedən stansiyanın fəaliyyətinin dayandırılmasına dair tələblərinə məhəl qoymayan Ermənistan onun fəaliyyətini bu gün də davam etdirir. Bu isə region ölkələri üçün ciddi təhlükə yaradır.
Sonda azərbaycanlı deputat həmkarlarını vətəndaşların sosial hüquqlarının təmini kimi qlobal məsələnin həlli üçün Avropa Şurasının və Avropa İttifaqının müxtəlif strukturları ilə birgə fəaliyyət göstərməyə çağırmışdır.
Əsgər Əliyev
AZƏRTAC-ın xüsusi müxbiri
Strasburq
Bölmənin digər xəbərləri
