MİLLİ BANKIN VALYUTA EHTİYATLARI İYULUN 1-NƏ 704,7 MİLYON DOLLAR TƏŞKİL ETMİŞDİR
Milli Bankın sərəncamında olan rəsmi valyuta ehtiyatlarının həcmi 2003-cü ilin birinci yarısında 24,2 milyon ABŞ dolları məbləğində artaraq, 704,7 milyon dollar təşkil etmişdir. Milli Bankın mətbuat xidmətindən bildirmişlər ki, hesabat dövründə ehtiyatlardan BVF-nin kreditləri üzrə əsas borcun qaytarılmasına və faizlərin ödənilməsinə 41,4 milyon ABŞ dolları xərclənmiş, 65,4 milyon ABŞ dolları isə Bakı-Tbilisi-Ceyhan neft kəmərinin tikintisi ilə əlaqədar Dövlət Neft Fonduna köçürülmüşdür. Birinci yarımildə beynəlxalq maliyyə institutları tərəfindən 52,6 milyon ABŞ dolları həcmində (18,2 milyon ABŞ dolları BVF-nin PRGF kreditləşdirmə proqramı çərçivəsində, 34,4 milyon ABŞ dolları isə Dünya Bankının SAC II proqramı üzrə) kreditlər alınmışdır. Beləliklə, əlavə olaraq nisbi artım 54,2 milyon ABŞ dolları təşkil etmişdir.Hesabat dövründə Milli Bankın ehtiyatlarının idarə edilməsindən əldə olunan gəlirlər 1,6 faiz təşkil etmişdir. Milli Bankın valyuta ehtiyatlarının idarə edilməsinin 2003-cü il üçün strategiyasına uyğun olaraq iyulun 1-dən etibarən Milli Bankın valyuta ehtiyatlarından 150 milyon ABŞ dolları həcmində vəsait “ABN AMRO Asset Management” (Hollandiya), “UBS Asset Management” (İsveçrə) və “JPMorgan Asset Management” (ABŞ) kimi dünyanın yüksək nüfuzlu və etibarlı xarici menecerlərinə idarəetməyə verilmişdir.
Bölmənin digər xəbərləri
