MİLLİ MƏCLİSDƏ QƏBUL
Yanvarın 31-də Milli Məclisin sədri Murtuz Ələsgərov Çin Xalq Respublikasının Azərbaycandakı fövqəladə və səlahiyyətli səfiri Çjan Qotsyanı ölkəmizdə diplomatik fəaliyyətinin başa çatması ilə əlaqədar qəbul etmişdir.
Murtuz Ələsgərov səfiri səmimiyyətlə salamlayaraq, Azərbaycanla Çin arasındakı əlaqələrin möhkəmlənməsində onun fəaliyyətini yüksək qiymətləndirdi. O dedi: “Ümumçin Xalq Nümayəndələri Məclisi Daimi Komitəsinin sədri Li Penin Azərbaycana rəsmi səfərinin təşkili, ÇXR-in Bakıdakı səfirliyinin yeni binasının açılışı Sizin səmərəli fəaliyyətinizlə bir vaxta düşmüşdür”.
Sonra Murtuz Ələsgərov Milli Məclislə daim əlaqə saxladığına görə səfirə təşəkkür etdi, diplomatik fəaliyyətində ona bundan sonra da uğurlar arzuladı.
Çjan Qotsyan səmimi qəbula görə təşəkkürünü bildirərək dedi ki, səfir vəzifəsini ölkələri və xalqları yaxınlaşdıran körpü ilə müqayisə etmək olar. Çin-Azərbaycan münasibətlərinin inkişafında ölkələrimizin dövlət və parlament başçılarının əlaqələri çox böyük rol oynayır. O vurğuladı ki, Azərbaycan Prezidenti Heydər Əliyevin və Ümumçin Xalq Nümayəndələri Məclisi Daimi Komitəsinin sədri Li Penin özülünü qoyduqları Çin səfirliyinin yeni binası ölkələrimizin dostluğunun rəmzi olacaqdır.
Görüşdə Milli Məclisin nümayəndə heyətinin ÇXR-ə qarşıdakı səfəri, Asiya ölkələri parlamentləri sədrlərinin aprelin 16-da Pekində keçiriləcək konfransında iştirakı məsələlərinə dair fikir mübadiləsi də aparıldı.
Bölmənin digər xəbərləri
