MİLLİ MƏCLİSDƏ QƏBUL
Oktyabrın 24-də Milli Məclisin sədri Murtuz Ələsgərov Misir Ərəb Respublikasının dövlət xarici işlər naziri xanım Faizə Əbul-Nəcanı qəbul etmişdir.
Murtuz Ələsgərov qonağı səmimiyyətlə salamlayaraq dedi ki, Misir hökuməti və parlamenti üzvlərinin ölkəmizə hər bir səfəri ikitərəfli əlaqələrin möhkəmlənməsinə kömək edir. Ölkələrimiz arasında intensiv əlaqələr hələ sovet dövründə mövcud idi. O illərdə ölkələrimizin elm və mədəniyyət xadimləri sıx əlaqə saxlayırdılar. Azərbaycan dövlət müstəqilliyini əldə etdikdən sonra ikitərəfli münasibətlər keyfiyyətcə yeni səviyyəyə qalxmışdır. Ölkələrimizin dövlət başçılarının görüşləri bu işdə mühüm rol oynamışdır. Azərbaycan Prezidenti Heydər Əliyev 1994-cü ildə Misirdə səfərdə olarkən Prezident Hüsnü Mübarəklə görüşmüş və münasibətlərimizin inkişaf perspektivlərini onunla ətraflı müzakirə etmişdir. Həmin səfər zamanı imzalanmış sənədlər Azərbaycanla Misir arasında qarşılıqlı surətdə faydalı əməkdaşlığın hüquqi bazasını yaratmışdır.
Milli Məclisin sədri parlamentlərarası münasibətlərin inkişaf perspektivlərinə toxunaraq xatırlatdı ki, Azərbaycan parlamentinin nümayəndə heyəti Misirdə olmuş və bu ölkənin parlamentinin sədri və parlamentin üzvləri ilə görüşmüşdür. Lakin parlamentlərarası əlaqələr ikitərəfli münasibətlərin səviyyəsinə cavab vermir. O bildirdi ki, Milli Məclisdə Misirlə parlamentlərarası dostluq qrupu fəaliyyət göstərir.
Sonra Milli Məclisin sədri Ermənistan-Azərbaycan, Dağlıq Qarabağ münaqişəsinin ağır nəticələri barədə qonağa ətraflı məlumat verdi və ölkəmizin ədalətli mövqeyini daim dəstəklədiyinə görə Misir xalqına və rəhbərliyinə minnətdarlığını bildirdi.
Xanım Faizə Əbul-Nəca parlamentlərarası əlaqələrin genişləndirilməsinin zəruriliyi fikri ilə razılaşaraq, Misir parlamentinin sədri Əhməd Sürurun salamlarını yetirdi. O dedi ki, Misirin parlamentində də Azərbaycanla münasibətlərin inkişafı üzrə komissiya fəaliyyət göstərir.
Qonaq ölkələrimizin dövlət başçıları arasında yaranmış qardaşlıq və dostluq münasibətlərini yüksək qiymətləndirərək bildirdi ki, Misir Prezidenti Azərbaycan Prezidentinə məktub göndərmiş və əlaqələrimizi bundan sonra da inkişaf etdirmək arzusunu ifadə etmişdir.
Sonra qonaq Fələstin-İsrail münaqişəsinin nizama salınmasında Misir rəhbərliyinin mövqeyi barədə ətraflı məlumat verdi. O, Ermənistan-Azərbaycan münaqişəsi məsələsinə toxunaraq vurğuladı ki, Misir Azərbaycanın ərazi bütövlüyünü dəstəkləyir və Dağlıq Qarabağla bağlı münaqişənin sülh yolu ilə həllinə üstünlük verir.
Qəbulda Azərbaycan xarici işlər nazirinin müavini Xələf Xələfov, Misirin ölkəmizdəki səfiri Cihan Əmin Məhəmməd Əli iştirak edirdilər.
Bölmənin digər xəbərləri
