SİYASƏT
MİLLİ MƏCLİSİN İCLASI
Fevralın 19-da Milli Məclisin növbəti iclası olmuşdur.
Milli Məclisin sədri Murtuz Ələsgərov iclası açaraq, Azərbaycan Prezidenti Heydər Əliyev ilə şənbə günü etdiyi telefon söhbəti barədə deputatlara məlumat verdi, Prezidentin parlamentin işi ilə maraqlandığını və Milli Məclis üzvlərinə salam göndərdiyini bildirdi. Parlamentin sədri dedi: ”İcazə verin, Milli Məclisin adından Azərbaycan Prezidenti Heydər Əliyevə tezliklə sağalmasını arzulayaq”.
Sonra Murtuz Ələsgərov iclasın gündəliyini elan etdi. Gündəlik ətrafında müzakirələrdə deputat Əli Əhmədov Xocalı faciəsinin günahkarlarının Beynəlxalq tribunala verilməsi məsələsinin Milli Məclisin xüsusi iclasında müzakirə olunmasını təklif etdi.
Deputat Nizami Cəfərov Azərbaycan dilinin təkmilləşdirilməsi məsələsinə toxundu. O, dilimizin beynəlxalq aləmdə təbliği işində Azərbaycan Prezidenti Heydər Əliyevin xidmətlərini xüsusi vurğuladı.
Murtuz Ələsgərov gündəliklə bağlı müzakirələrə yekun vuraraq bildirdi ki, parlamentin rəhbərliyi Xocalı faciəsinin 10 illiyi ilə əlaqədar yaxın günlərdə xüsusi iclas keçirməyi və xarici ölkələrin Bakıda akkreditə olunmuş bütün səfirlərini həmin iclasa dəvət etməyi nəzərdə tutur. Xocalı faciəsinə siyasi qiymət verilməsi məsələsi Türkiyə Böyük Millət Məclisinin iclasında da müzakirə olunacaqdır. Bundan əlavə, bütün türk dövlətlərinin parlamentlərinə bu məsələni müzakirə etmək və həmin faciəyə siyasi qiymət vermək barədə müraciət qəbul olunacaqdır.
Sonra deputatlar gündəliyə daxil edilmiş məsələlərin müzakirəsinə başladılar.
İqtisadi siyasət daimi komissiyasının sədri Səttar Səfərovun qısa məlumatından sonra deputatlar 2001-ci il dekabrın 20-də Azərbaycan və Fransa hökumətləri arasında imzalanmış “İkiqat vergitutmanın aradan qaldırılması, gəlir və kapitala görə vergiləri ödəməkdən yayınmanın qarşısının alınması haqqında” konvensiyanı səs çoxluğu ilə ratifikasiya etdilər.
Deputatlar ölkəmizin Dünya Poçt İttifaqının Nizamnaməsinə, Dünya Poçt Konvensiyasına , “Poçt bağlamaları haqqında” sazişi, “Gömrük hüquqpozmalarının qarşısının alınması, təhqiq edilməsi və aradan qaldırılmasına dair qarşılıqlı inzibati yardım haqqında” konvensiyaya qoşulması haqqında sənədləri, habelə “Hesablama palatası haqqında” Əsasnaməni təsdiqlədilər.
Fasilədən sonra “Büdcə sistemi haqqında” Azərbaycan Respublikası Qanunu layihəsinin müzakirəsinə başlandı. Bu layihə birinci oxunuşda qəbul edildi.