“Milli-mənəvi dəyərlərin mühafizəsində kitabxanaların rolu” mövzusunda beynəlxalq konfrans keçirilib
Bakı, 1 oktyabr, AZƏRTAC
Oktyabrın 1-də XI Bakı Beynəlxalq Kitab Sərgisi çərçivəsində Mədəniyyət Nazirliyi və Milli Kitabxananın birgə təşkilatçılığı ilə Bakı Ekspo Mərkəzində “Milli-mənəvi dəyərlərin mühafizəsində kitabxanaların rolu” mövzusunda beynəlxalq konfrans keçirilib.
AZƏRTAC xəbər verir ki, konfransı açan Azərbaycan Milli Kitabxanasının direktoru professor Kərim Tahirov son dövrlərdə kitaba marağın artmasının qürurverici hal olduğunu deyib. Qeyd edib ki, kitabxanalar milli-mənəvi dəyərlərin saxlanc yeri olmaqla yanaşı, onların etibarlı mühafizəsi və gələcək nəsillərə çatdırılması baxımından mühüm əhəmiyyət daşıyır.
Professor qeyd edib ki, kitab və nəşr məhsulları milli-mənəvi dəyərlərin əsas komponentlərindən biridir. Bu səbəbdən onların qorunmasına və mühafizəsinə diqqətin artırılması vacibdir. Kitabxanalar isə bu missiyanın həyata keçirilməsində mühüm rol oynayır.
Milli Məclisin Mədəniyyət komitəsinin sədri, Xalq artisti Polad Bülbüloğlu çıxışında kitabın hər zaman Azərbaycanda və dünyanın müxtəlif ölkələrində qorunub saxlanıldığını vurğulayıb. Komitə sədri beynəlxalq kitab sərgilərinin əhəmiyyətini qeyd edərək, gənclərin kitaba marağının artırılmasının vacibliyini diqqətə çatdırıb. O, əsas məqsədin kitabların və milli-mənəvi dəyərlərimizin qorunub saxlanılması olduğunu bildirib.
Konfransda Türkiyə Cümhuriyyəti Millət Kitabxanasının rəhbəri Ayhan Tuğlu, Azərbaycan Respublikası Prezidentinin İşlər İdarəsinin Prezident Kitabxanasının direktoru filologiya elmləri doktoru, professor Afət Abbasova, Mərakeş Krallığının Azərbaycandakı səfiri Məhəmməd Adil Embarş, BDU-nun İnformasiya və sənəd menecmenti fakültəsinin dekanı dosent Ələmdar Cabbarlı, Küveyt Milli Kitabxanasının direktoru Seham Alezam çıxış ediblər.
Çıxış edənlər kitabxanaların millətin yaddaşını, bilik və mədəniyyətini birləşdirən, kitabları qoruyub saxlayan müqəddəs məkan olduğunu diqqətə çatdırıblar. Bildirilib ki, milli-mənəvi dəyərlərin yaşadılması tariximizə, bu günümüzə və gələcəyimizə göstərilən ehtiramın təcəssümüdür. Çıxışlarda Ümummilli Lider Heydər Əliyevin kitabxanalara göstərdiyi diqqət və qayğı xüsusi vurğulanıb. Həmçinin Bakı Beynəlxalq Kitab Sərgisinin əhəmiyyəti qeyd edilərək, kitabxanalar arasında əlaqələrin qurulmasının önəmi diqqətə çatdırılıb.
Tədbirdə Azərbaycan Milli Kitabxanasına həsr edilmiş videoçarx nümayiş olunub.
Daha sonra konfrans məruzələrlə davam edib.
Milli Kitabxananın Elmi işlər və kitabxana-informasiya xidməti üzrə direktor müavini Ədibə İsmayılova “Mədəni irs nümunələrinin mühafizəsi sahəsində Azərbaycan Milli Kitabxanasının fəaliyyəti”, Mərakeş Krallığının Milli Kitabxanasının direktoru Samira El Malizi “Keçmişi qorumaq, gələcəyi ilhamlandırmaq: Mərakeş Krallığının Milli Kitabxanasının öhdəliyi”, Türkiyə Cümhuriyyəti Millət Kitabxanasının rəhbəri Ayhan Tuğlu “Kitabxanaların mədəni irsin qorunmasında rolu: Cümhuriyyət Millət Kitabxanası”, Azərbaycan Respublikası Prezidentinin İşlər İdarəsinin Prezident Kitabxanasının direktoru filologiya elmləri doktoru, professor Afət Abbasova “Kitabxanalar – dəyərlərimizi gələcəyə aparan körpüdür”, Küveyt Milli Kitabxanasının direktoru Seham Alezam “İrsdən gələcəyə: Küveyt Milli Kitabxanasının mədəniyyət sahəsində rolu”, AMEA-nın Mərkəzi Elmi Kitabxanasının direktoru, texnika elmləri doktoru Hüseyn Hüseynov “Kitabxanaların milli-mənəvi dəyərlərin qorunmasında və inkişaf etdirilməsində rolu”, Azərbaycan Respublikasının Əqli Mülkiyyət Agentliyinin tabeliyində olan Respublika Elmi-Texniki Kitabxanasının direktoru dosent Mübariz Məmmədli “Respublika Elmi-Texniki Kitabxanasında Azərbaycanın elmi və mədəni mülkiyyətinin qorunması”, Azərbaycan Milli Kitabxanasının Elmi-tədqiqat kitabxanaşünaslıq və metodik təminat şöbəsinin müdiri Aygün Koçak “Azərbaycan Milli Kitabxanasında mühafizə olunan qiymətli İstanbul nəşrləri (XVIII–XIX əsrlərə aid nadir əsərlər haqqında)” mövzularında çıxış ediblər.
Bölmənin digər xəbərləri
