MİLLİ TƏHLÜKƏSİZLİK NAZİRLİYİNİN HEYDƏR ƏLİYEV ADINA AKADEMİYASINDA XOCALI SOYQIRIMI QURBANLARININ XATİRƏSİ ANILMIŞDIR
Bakı, 27 fevral (AZƏRTAC). Fevralın 26-da Milli Təhlükəsizlik Nazirliyinin Heydər Əliyev adına Akademiyasında Xocalı soyqırımının 17-cı ildönümünə həsr olunmuş tədbir keçirilmişdir.
Xocalı faciəsi qurbanlarının xatirəsi bir dəqiqəlik sükutla yad edilmişdir.
Sonra Azərbaycanın dövlət himni səsləndirilmişdir.
Akademiyanın rəis müavini, general-mayor İsgəndər Allahverdiyev 1992-ci il fevralın 26-na keçən gecə erməni quldur dəstələrinin və keçmiş sovet imperiyasının 366-cı alayının Xocalının dinc sakinlərini - qocaları, körpələri, qadınları vəhşicəsinə qətlə yetirməsindən, faciənin səbəb və nəticələrindən ətraflı danışmışdır. Bildirilmişdir ki, 26 fevral faciəsi xalqımızın milli mənliyinə, milli azadlıq ruhuna qarşı misli görünməmiş bir təcavüz olmaqla yanaşı, həm də tariximizin qəhrəmanlıq səhifəsidir. O gecə Azərbaycan xalqı özünün yenilməzliyini, qəhrəmanlığını, Vətənə, torpağa sədaqətini, müstəqillik və azadlıq uğrunda mübarizə əzmini bütün dünyaya nümayiş etdirmişdir.
İ.Allahverdiyev vurğulamışdır ki, yalnız ümummilli lider Heydər Əliyevin siyasi hakimiyyətə qayıdışından sonra Xocalı faciəsinə siyasi qiymətin verilməsi, bu dəhşətin azərbaycanlıların soyqırımı kimi tanınması, faciə qurbanlarının ailə üzvlərinə dövlət qayğısının göstərilməsi mümkün olmuşdur. Şəhidlərimizin adlarının əbədiləşdirilməsi, onların ailə üzvlərinə yardım göstərilməsi barədə qəbul olunmuş fərman və sərəncamlar bu insanların xatirəsinə böyük ehtiram və diqqətdir.
Natiq çıxışında Prezident İlham Əliyevin həyata keçirdiyi uğurlu daxili və xarici siyasətin, əzəli torpaqlarımızın geri qaytarılması istiqamətində atılan addımların öz bəhrəsini verdiyini qeyd etmişdir. O demişdir ki, ümummilli lider Heydər Əliyevin siyasi kursu onun layiqli davamçısı, ölkəmizin başçısı İlham Əliyev tərəfindən qətiyyətlə davam etdirilir. Münaqişənin diplomatik, sivil yolla həllinə üstünlük verən ölkə Prezidenti, lazım gələrsə, erməni təcavüzünə qarşı hücum mövqeyindən çıxış etməyin mümkünlüyünü və buna qadir güclü silahlı qüvvələrimizin olduğunu daim vurğulayır.
Sonda İ.Allahverdiyev akademiyanın zabit və kursant heyətini erməni təcavüzünün günahsız qurbanlarının qisasını almağa, itirilmiş torpaqların geri qaytarılması uğrunda son və həlledici mübarizəyə, Azərbaycan Silahlı Qüvvələrinin Ali baş komandanı, Prezident İlham Əliyevin əmrinə hər an hazır olmağa çağırmışdır.
Tədbirdə çıxış edən kursantlar Azərbaycanın müstəqilliyinin daha da möhkəmləndirilməsi və əbədi olması uğrunda usanmadan çalışacaqlarını, bütün Azərbaycan gəncləri kimi, Vətənin müstəqilliyi, ərazi bütövlüyü uğrunda Prezident İlham Əliyevin ətrafında sıx birləşəcəklərini, dövlətçiliyimizin möhkəmlənməsi üçün səylərini əsirgəməyəcəklərini bildirmişlər.
Tədbirin sonunda Xocalı soyqırımına həsr olunmuş “Xocalı” sənədli filmi nümayiş etdirilmişdir.
Bölmənin digər xəbərləri
