Millinin sabiq basketbolçusu: Azərbaycanı həmişə yaxşı xatırlayacağam, bu ölkə mənim ikinci evimdir - MÜSAHİBƏ
Bakı, 4 fevral, AZƏRTAC
Azərbaycanın qadınlardan ibarət 3x3 basketbol yığmasının sabiq üzvü Mersedes Volker AZƏRTAC-ın suallarını cavablandırıb. Həmin müsahibəni təqdim edirik.
- Peşəkar idmançı karyeranızı başa vurduqdan sonra dondurma biznesi ilə məşğul olmağa necə qərar verdiniz?
- Bəli, ötən il karyeramı bitirdikdən sonra vətənimə qayıtdım. Hazırda ABŞ-ın Texas ştatının Hyuston şəhərində yaşayıram və buradakı insanlar mövsümdən asılı olmayaraq dondurma yeməyi çox xoşlayırlar. Mən də özümü başqa sahədə sınamaq istədiyim üçün dondurma biznesi işə məşğul olmağa qərar verdim. Biznesim şəhər sakinlərinin marağına səbəb olduğu üçün çox sevinirəm. İlk zamanlar qorxurdum. Çünki bu iş mənim üçün yeni idi. İlk dəfə idi biznes sahəsində özümü sınamaq qərarına gəlmişdim. Uğursuz olacağıma dair şübhələrim var idi. Amma hər şey istədiyim kimi alındığı üçün xoşbəxtəm.
- Karyeranızı məşqçi kimi davam etdirməməyinizə nə səbəb oldu?
- Basketbola fasilə vermək istədim. Buna ehtiyacım var idi. Mən hazırda bütün diqqətimi dondurma biznesinə yönəltmişəm və bu işlə məşğul olmağa davam etmək niyyətindəyəm. Amma vaxtım və istəyim olarsa, bəlkə yenidən basketbola qayıda, məşqçi kimi çalışa bilərəm.
- Hazırkı həyatınızdan razısınızmı?
- Yeni həyatımı sevirəm. Çünki artıq qaçmalı deyiləm (gülür).
- Basketbol üçün darıxırsınız?
- Əlbəttə ki, darıxıram. Buna görə də beynəlxalq yarışlardakı oyunları sosial şəbəkələr vasitəsi ilə izləyirəm. İzləyə bilmədiyim matçların bəzilərinin isə nəticələrinə baxıram.
- 2015-ci ildən Azərbaycan yığmasının heyətində çıxış edirsiniz. Bu illər ərzində keçirdiyiniz günləri necə xatırlayırsınız?
- Mən Azərbaycanı həmişə yaxşı xatırlayacağam. Bu ölkə mənim ikinci evimdir. Azərbaycanın bir çox bölgəsində, xüsusilə də Bakıda xatirələrim olub. Yeni dostlar qazanıb, yaxşı və faydalı insanlar tanımışam. Bunları heç vaxt unutmuram.
- Əgər Azərbaycandan təklif gəlsə, burada qalıb məşqçi kimi fəaliyyət göstərmək istərdinizmi?
- Əgər belə bir təklif gəlsə, mən mütləq Azərbaycana qayıdacaq və bu fürsəti dəyərləndirəcəyəm.
- Milli komandanın heyətində keçirdiyiniz ən unudulmaz və sizi ən çox məyus edən oyunlar hansılar olub?
- Məni ən çox məyus edən “Paris-2024” Yay Olimpiya Oyunlarında Avstraliya seçməsi ilə keçirdiyimiz debüt qarşılaşmamız idi. İlk oyundan məğlub olduğumuz üçün növbəti matçlarda motivasiyamızı bərpa edib, toparlanmalı idik. Həmin vaxt bunu bacarmaq mənim üçün olduqca çətin idi. Çünki özümüzdən daha artığını gözləyirdik. Ən unudulmazı isə sözsüz ki, turnirin ikinci görüşündə reytinq sıralamasının bir nömrəli komandası olan Çin yığması ilə oyunumuz idi. Belə çətin kollektivə qalib gəlmişdik. Düşünürəm ki, həmin görüşü heç bir keçmiş komanda yoldaşım unuda bilmir.
Bölmənin digər xəbərləri
