DÜNYA
Milo Cukanoviç Sosialistlərin Demokratik Partiyasının sədri vəzifəsindən istefa verib
Podqoritsa, 6 aprel, AZƏRTAC
Monteneqro Prezidenti Milo Cukanoviç Sosialistlərin Demokratik Partiyasının sədri vəzifəsindən istefa verdiyini açıqlayıb.
AZƏRTAC xəbər verir ki, M.Cukanoviç bu qərarı prezident seçkilərindəki məğlubiyyətindən sonra qəbul edib.
Onun istefasından sonra partiyaya Monteneqro parlamentində partiya qrupunun rəhbəri Daniyel Zivkoviç sədrlik edəcək.
1998-ci ildən Sosialistlərin Demokratik Partiyasına sədrlik edən M.Cukanoviçin səlahiyyət müddəti mayın 21-də başa çatacaq. Altmış bir yaşlı M.Cukanoviç partiyaya sədrlik etdiyi 25 illik müddətində altı dəfə Baş nazir, iki dəfə (1997-2003-cü və 2018-2023-cü illər) prezident olub. Onun prezidentlik səlahiyyətinin müddəti isə mayın 19-da başa çatacaq.
Xatırladaq ki, Monteneqroda aprelin 2-də keçirilən seçkilərin ikinci turunda sabiq iqtisadiyyat naziri, Avropa Hərəkatının rəhbəri 37 yaşlı Yakov Milatoviç seçicilərin 60 faizinin səsini toplayaraq ölkənin səkkizinci prezidenti seçilib.
AZƏRTAC-ın xüsusi müxbiri
Podqoritsa