MİNGƏÇEVİRDƏ ÖTƏN İLİN YEKUNLARI MÜZAKİRƏ OLUNMUŞDUR
Müşavirə iştirakçıları, əvvəlcə, ümummilli liderimiz Heydər Əliyevin abidəsini ziyarət etmişlər.
Şəhər icra hakimiyyətinin başçısı Lütfəli Babayevin hesabat məruzəsi dinlənildikdən sonra “Azərenerji” Səhmdar Cəmiyyətinin prezidenti Etibar Pirverdiyev, Milli Məclisin deputatları Əli Hüseynov, Aydın Mirzəzadə və digər natiqlər çıxış etmiş, geniş müzakirələr aparılmışdır. Qeyd edilmişdir ki, regionların sosial-iqtisadi inkişafı Dövlət Proqramından irəli gələn və Prezident İlham Əliyevin bölgələrə səfərləri zamanı qarşıya qoyduğu vəzifələrin yerinə yetirilməsi sahəsində ötən il xeyli iş görülmüş, şəhərin sənaye müəssisələrində 799 milyard manatlıq (159,8 milyon AZN) məhsul istehsal edilmiş və xidmətlər göstərilmiş, istehsalın həcmi 2004-cü illə müqayisədə 48 milyard manat (96 milyon AZN) və ya 6,3 faiz artmışdır. İstehsal olunan məhsulun 764 milyard manatlığı (152,8 milyon AZN) və ya 95,6 faizi dövlət sektorunda, 35 milyard manatlığı (7 milyon AZN) və ya 4,4 faizi özəl bölmədə istehsal edilmişdir.
Hesabat ilində əvvəlki ilə nisbətən dövlət sektorunda istehsalın həcmi 5,3 faiz, özəl istehsal sahəsində 34 faiz artmışdır. 2005-ci ildə şəhər sənayesinin bütün sahələrində istehsalın artımı müşahidə olunmuş, o cümlədən mədən sənayesi sahəsində 62 faiz, emal sahəsində 73 faiz, elektrik enerjisi istehsalı sahəsində 3,6 faiz təşkil etmişdir. Bildirilmişdir ki, 2006-cı ilin əvvəlinə şəhərin sənaye müəssisələrində çalışan işçilərin sayı 6223 nəfər, faktiki işlə təmin olunanların sayı 4448 nəfər olmuşdur. İşləyənlərin 3466 nəfəri dövlət sektorunda, 982 nəfəri sənayenin özəl sektorunda çalışmışdır. Sənaye müəssisələrində çalışan işçilərin 67 faizi elektrik enerjisi istehsalı sahəsində, 30 faizi emal sənayesində, 3 faizi mədən sənayesində işləmişdir. Sənayedə çalışanların orta aylıq əmək haqqı 27,8 faiz artaraq, 539 min manata (107,8 AZN) çatdırılmışdır. O cümlədən, dövlət sektorunda işləyənlərin orta aylıq əmək haqqı 632 min manat (126,4 AZN) özəl sektorda çalışanların orta aylıq əmək haqqı 204 min manat (40,8 AZN) olmuşdur. Bu göstərici mədən sənayesində 157 min manat (31,4 AZN), emal sənayesində 237 min manat (47,4 AZN), elektroenergetika sektorunda 730 min manat (146 AZN ) təşkil etmişdir.
Hesabat dövründə 11,8 milyard kilovat saat elektrik enerjisi, 433 min ton inşaat qumu, 2,3 milyon kvadratmetr pambıq parça, 119 ton şüşə lifi, 117 ton istilik izolyasiya materialı, 580 ton elektrik naqili, 1,7 milyard manatlıq (340 min AZN) neft avadanlığı üçün ehtiyat hissələri istehsal edildiyi diqqətə çatdırılmışdır. Bütün maliyyə mənbələri hesabına tikinti-quraşdırma işlərinə 70 milyard manat (14 milyon AZN), o cümlədən istehsal təyinatlı obyektlərin inşasına 65 milyard manat (13 milyon AZN) sərmayə yönəldilmişdir. İl ərzində Mingəçevir şəhərində 19 milyard manatlıq (3,8 milyon AZN) əsas fondlar, o cümlədən 14,4 milyard manatlıq (2,9 milyon AZN) istehsal təyinatlı əsas fondlar istifadəyə verilmişdir.
Qeyd olunmuşdur ki, ötən il tikinti sahəsində fəaliyyət göstərən podratçı təşkilatların öz gücləri ilə gördükləri işlərin həcmi 8,2 milyard manat (1,6 milyon AZN) olmuşdur ki, bu da əvvəlki illə müqayisədə 44 faiz artım deməkdir. Hesabat dövründə yerinə yetirilmiş ümumi inşaat işlərinin 2,4 milyard manatı (480 min AZN) və ya 29,3 faizi yeni tikinti, yenidənqurma və genişləndirmə işləri, 5,3 milyard manatı (1,1 milyon AZN) və ya 64,5 faizi əsaslı təmir, 542 milyon manatı (108,4 min AZN) və ya 6,2 faizi cari təmir və sair tikinti işləri təşkil etmişdir. Şəhid ailələri və Qarabağ müharibəsi əlilləri üçün tikilmiş 24 mənzilli yaşayış binası ilə yanaşı, ümumi sahəsi 2,6 min kvadratmetr olan 16 fərdi yaşayış binası da tikilib istifadəyə verilmişdir. Tikinti sahəsində işləyənlərin sayı 2005-ci ilin yekununda 365 nəfərə çatdırılaraq, əvvəlki ilə nisbətən 29,4 faiz artmış və onların orta aylıq əmək haqqı il ərzində 25,4 faiz yüksələrək, 226 min manat (45,2 AZN) olmuşdur.
Ümumiyyətlə, ötən il şəhər iqtisadiyyatının bütün sahələrində orta aylıq əmək haqqının 25-35 faiz artımı müşahidə edilmişdir.
Azərbaycan Prezidenti İlham Əliyevin şəxsi təşəbbüsü ilə şəhərdə “Kür” elektron avadanlığı istehsalı və yüksək gərginlikli elektrik xətləri üçün beton dayaqlar istehsalı üzrə ixtisaslaşmış “İnterenerji” zavodlarının tikintisinin başa çatması, müasir tələblərə cavab verən məhsul istehsalına başlaması, “Günəşli” yaşayış massivində müasir orta məktəb binasının inşası minnətdarlıq hissi ilə vurğulanmışdır.
Müşavirədə şəhər həyatının bütün sahələri ətraflı təhlil olunmuş, nöqsanların aradan qaldırılması, problemlərin həlli ilə bağlı konkret tədbirlər planı müəyyən edilmişdir.
Müşavirə iştirakçıları adından Azərbaycan Prezidenti İlham Əliyevə müraciət qəbul olunmuşdur.
