QAN YADDAŞI
Mingəçevirlilər “Azərbaycanlıların soyqırımı və deportasiyası” abidə kompleksini ziyarət etmişlər
Mingəçevir, 30 mart (AZƏRTAC). 31 mart Azərbaycanlıların soyqırımı günü ilə bağlı Mingəçevirdə ümumşəhər tədbiri keçirilmişdir.
AZƏRTAC xəbər verir ki, şəhər icra hakimiyyətinin, hüquq mühafizə orqanlarının, idarə, müəssisə və təşkilatların kollektivləri, təhsil, səhiyyə və mədəniyyət işçiləri, gənclər “Azərbaycanlıların soyqırımı və deportasiyası” abidə kompleksinin önünə əklil və gül dəstələri düzmüş, şəhid soydaşlarımızın xatirəsini ehtiramla yad etmişlər.
Matəm mitinqində çıxış edənlər xalqımızın tarixən qarşılaşdığı çətinliklərdən söz açmış, erməni millətçilərinin zaman-zaman Azərbaycan torpaqlarında törətdikləri qanlı cinayətləri yada salmışdır.
Bildirilmişdir ki, “Böyük Ermənistan” yaratmaq kimi sərsəm xülya ilə yaşayan daşnaklar təkcə 1918-ci ilin mart qırğınları zamanı on minlərlə azərbaycanlını qəddarcasına qətlə yetirmişlər. Kənd və şəhərlərimizi viran qoyaraq tarixi abidələrimizi məhv etmişlər. Təəssüf ki, sovet hakimiyyəti illərində də imperiya rəhbərlərini ələ almağa bacaran ermənilər məkrli siyasətlərini davam etdirərək soydaşlarımızı bir neçə dəfə deportasiyaya məruz qoymuşlar. Yalnız ümummilli liderimiz Heydər Əliyevin qətiyyəti sayəsində xalqımızın başına gətirilən soyqırımı hadisələri barədə həqiqətlər üzə çıxarılmış, bu dəhşətli faciələrə hüquqi və siyasi qiymət verilmişdir.
Ümumşəhər anma mərasimində ictimaiyyətin nümayəndələri, Mingəçevirdə məskunlaşmış məcburi köçkünlər çıxış edərək erməni vandalizmini qətiyyətlə pisləmişlər. Azərbaycan həqiqətlərinin dünya ictimaiyyətinə daha dolğun çatdırılması üçün dövlətimizin və Heydər Əliyev Fondunun həyata keçirdiyi davamlı tədbirləri yüksək qiymətləndirmişlər.