MİNSKDƏ “QOBUSTAN” CƏMİYYƏTİNİN YUBİLEYİ QEYD OLUNMUŞDUR
Bakı, 29 oktyabr (AZƏRTAC). Diasporla İş üzrə Dövlət Komitəsinin mətbuat xidmətindən bildirmişlər ki, oktyabrın 27-də Minsk şəhərindəki “Millətlər və Mədəniyyətlər Sarayı”nda Belarusda fəaliyyət göstərən “Qobustan” Cəmiyyətinin yubileyi qeyd olunmuşdur.
Cəmiyyətin sədri Baxşı Qəmbərov çıxış edərək qurumun 20 illik fəaliyyətindən, əldə etdiyi uğurlardan, digər xalqları təmsil edən icmalarla qarşılıqlı əlaqələrindən danışmışdır. Bildirmişdir ki, cəmiyyətin təşəbbüsü və təşkilatçılığı ilə cari ildə reallaşdırılan iki böyük layihə - Belarusun Vileyka şəhərində iki dəfə Sovet İttifaqı Qəhrəmanı, general-mayor Həzi Aslanovun heykəlinin, Magilyov şəhərində isə Sovet İtifaqı Qəhrəmanı Aslan Vəzirovun büstünün qoyulması yüksək dəyərləndirilmişdir. Bu həm də “Qobustan”ın bu ölkədə nüfuzunun və imkanlarının göstəricisi hesab oluna bilər. B.Qəmbərov cəmiyyətin gələcək planları barədə də məlumat vermişdir.
Tədbirdə iştirak edən Diasporla İş üzrə Dövlət Komitəsinin şöbə müdiri Şakir Səlimov Dövlət Komitəsi tərəfindən “Qobustan” Cəmiyyətinin gördüyü işlərin yüksək qiymətləndirildiyini bildirmişdir. O demişdir ki, Diasporla İş üzrə Dövlət Komitəsi bundan sonra da cəmiyyətin fəaliyyətinə və həyata keçirəcəyi layihələrə dəstək verəcəkdir.
Şakir Səlimov Belarusdakı azərbaycanlıların diaspor işində fəallığının artırılması, soydaşlarımız arasında milli mənəvi dəyərlərimizin, mədəniyyətimizin, adət-ənənələrimizin qorunub saxlanmasında və yeni nəsillərə ötürülməsində “Qobustan” Cəmiyyətinin böyük rolu olduğunu qeyd etmiş, Azərbaycan dövlətinin hər zaman onların arxasında olduğunu vurğulamışdır.
Belarus Nazirlər Kabinetinin milli məsələlər üzrə şöbəsinin müdiri Mixail Rıbakov hökuməti adından “Qobustan” Cəmiyyətinin rəhbərliyini və üzvlərini təbrik etmiş, təşkilatın gördüyü işlərin ölkə rəhbərliyinin diqqətindən yayınmadığını və hər zaman yüksək qiymətləndirildiyini bildirmişdir.
Belarusdakı Azərbaycan İcmaları Konqresinin sədri Natiq Bağırov qurumun 20 il ərzində bu ölkədəki soydaşlarımızın təşkilatlanmasındakı rolundan danışmış, Konqres ilə Cəmiyyətin əməkdaşlığının gələcəkdə də uğurla davam etdiriləcəyini qeyd etmişdir.
Azərbaycan Respublikasının Belarusdakı səfirliyinin müşaviri Asya Manafova və digər xalqların diaspor təşkilatlarının rəhbərləri də cəmiyyətə təbriklərini çatdırmışlar.
Sonda Azərbaycan və Belarus incəsənət xadimlərinin iştirakı ilə konsert olmuşdur.
Bölmənin digər xəbərləri
