Misirin vətəndaş cəmiyyəti fəalı: Azərbaycanın mina təhlükəsizliyi ilə bağlı səylərini dəstəkləyirik
Bakı, 12 oktyabr, AZƏRTAC
Müharibə və silahlı münaqişə zonalarında ərazilərin minalardan təmizlənməsi ən aktual qlobal problemlərdən biridir. Torpaqlarını işğaldan azad etmiş Azərbaycanın bu məsələdə göstərdiyi səyləri, Bakının beynəlxalq təşkilatlara müraciətlərini dəstəkləyir, həmçinin bir qrup xarici QHT, vətəndaş cəmiyyəti fəallarının başlatdığı “Minadan azad dünya üçün qlobal təşəbbüs” adlı petisiyaya qoşuluruq.
Bu sözləri AZƏRTAC-a müsahibəsində Misirin vətəndaş cəmiyyəti fəalı, Əl-Əzhər Universitetinin tədqiqatçısı Əsma Əhməd Behairi söyləyib. O əlavə edib: “Məlum olduğu kimi, minalar və digər təhlükəli silahlar mülki əhalinin sağlamlığı və həyatı üçün ciddi təhlükə yaradır. Münaqişələr bitdikdən sonra da minalar insanları öldürməyə və sağlamlığına xəsarət yetirməyə davam edir. Onlar ömürlük əlilliyə səbəb olur, ağır psixoloji travmalar yaradır, eyni zamanda, iqtisadi və sosial inkişafa mane olur. Minalar insanları dolanışıq mənbələrindən də məhrum edir, müharibədən sonrakı bərpa işlərinə mane olur, sülhməramlı qüvvələrin yerləşdirilməsinə və humanitar yardımın çatdırılmasına əngəl törədir”.
Mina təhlükəsizliyi üzrə qlobal vəziyyəti şərh edən misirli gənc tədqiqatçı qeyd edib: “Məsələn, Afrika qitəsində minalardan çox təsirlənən ölkələr siyahısına Çad və Nigeriya başçılıq edir. İyunun 24-də Çadın şərqində qaçqın düşərgəsində baş vermiş son insident zamanı 9-12 yaş arası 4 qaçqın uşaq bu səbəbdən həyatını itirib, daha 3 azyaşlı isə ağır yaralanıb. Bu arada, Nigeriyanın şimal-şərqində 2019-cu ildə əldəqayırma partlayıcı qurğuların partlaması nəticəsində təxminən 230 nəfər ölüb, 300-dən çox insan yaralanıb. Cənub-şərqi Asiya ölkəsi Laos partlamamış sursatlarla ən yüksək çirklənmə səviyyəsinə malikdir və minalar 50,836 nəfərin həlak olmasına səbəb olub. Bundan əlavə, Vyetnamın ümumi ərazisinin 18,71 faizini təşkil edən 6,1 milyon hektarda təxminən 800 min ton təmizlənməmiş mina və partlamamış sursat var”.
Azərbaycana səfərləri zamanı mina problemi ilə yaxından tanış olduğunu qeyd edən Əsma Behairi vurğulayıb: “Təəssüf ki, mina problemindən əziyyət çəkən ölkələrin sırasında dost Azərbaycan Respublikası da var. Bilirik ki, 30 il ərzində 3406 nəfər minaların qurbanı olub. 2020-ci ildə İkinci Qarabağ müharibəsi başa çatdıqdan sonra 327 azərbaycanlı xarabalığa çevrilmiş yaşayış massivlərində, əkin sahələrində, qəbiristanlıqlarda, çay sahillərində, istifadəsiz yollarda və s. minaların partlaması nəticəsində həlak olub və ya yaralanıb. Mina qurbanlarının təxminən 90 faizi azərbaycanlı mülki şəxslərdir.
Azərbaycan Prezidenti İlham Əliyevin BMT-nin 18-ci Dayanıqlı İnkişaf Məqsədi kimi “minasız dünya” məqsədinin elan edilməsi təşəbbüsünü alqışlayıram. Eyni zamanda, bir qrup xarici QHT, vətəndaş cəmiyyəti fəallarının “Jotform” beynəlxalq platformasında “Dünya Qafqazda sülh üçün” (“World for Peace in Caucasus”) adlı kampaniya çərçivəsində elan olunmuş “Minadan azad dünya üçün qlobal təşəbbüs” adlı petisiyaya qoşulmuşam və öz ölkəmdə Azərbaycanı sevən hər bir fəalı buna dəvət edirəm. Azərbaycanı ikinci vətəni kimi sevən tədqiqatçı kimi, öz araşdırmalarımda bu mühüm məsələnin həllinə töhfə verməyə çalışacağam”.
Bölmənin digər xəbərləri
