Misirli yazıçı: Azərbaycanlı ədiblərlə müştərək tədbirlərin təşkil olunmasını arzulayıram
Qahirə, 27 yanvar, AZƏRTAC
Qardaş Azərbaycan dövlətinin kitab stendini sevinc hissi ilə ziyarət etdim. Stenddə ölkənizin mədəniyyəti, tarixi və görkəmli şəxsiyyətləri ilə bağlı maraqlı kitablar nümayiş olunur. Kitablar arasında Azərbaycanın birinci xanımı Mehriban Əliyevanın ictimai fəaliyyətindən bəhs edən kitabı gördüm. Onu deyim ki, bir xanım yazıçı kimi qadınların cəmiyyətdə rolu məni sevindirir.
Bu sözləri Misir yazıçısı Muna əl-Şeimi AZƏRTAC-ın müxbirinə müsahibəsində deyib.
“Burada Azərbaycanın əsrarəngiz təbiəti barədə, sənətkarlıq nümunələri, xüsusilə də xalçaçılıq haqqında kitablar da mənim marağımı çəkdi. Azərbaycan stendində sərgilənənlər arasında şairləriniz Nizami Gəncəvi və Məhsəti Gəncəvi yaradıcılığına həsr olunmuş kitabları da gördüm. Zəngin ədəbi ənənələriniz barəsində çox oxumuşdum. Düşünürəm ki, ölkənizin təbiəti insanı yaradıcılığa həvəsləndirir. Şuşa şəhəri haqqında kitabı vərəqləyərkən bu zənginliyi aydın görürəm. Stenddəki kitablardan bəziləri mənə hədiyyə edildi. Bu əsərlər mənim şəxsi kitabxanamın bir parçası olacaq”, - deyə misirli yazıçı qeyd edib.
Yazıçı əlavə edib ki, Azərbaycanın Qahirə Kitab Sərgisində iştirakı ölkələrimiz arasında sıx əlaqələrin varlığını göstərir. Xüsusilə xalqlarımız arasında ortaq və oxşar mədəni bağlar mövcuddur. Muna əl-Şeimi bu əlaqələrin daha da inkişafını, iki ölkənin ədiblərinin iştirakı ilə gələcəkdə ortaq ədəbi tədbirlərin təşkil olunmasını arzuladığını dilə gətirib.
Muna əl-Şeimi 6 romanın, 3 hekayə məcmuəsinin və uşaqlar üçün kitabların müəllifidir. Yazıçı bir sıra ədəbi mükafatların laureatıdır. Onun “Vatanul-cibil-xəlfi” (Ehtiyat vətən) romanı ərəb dünyasında mötəbər Kattara mükafatına layiq görülüb.
Qeyd edək ki, 56-cı ənənəvi Qahirə Beynəlxalq Kitab Sərgisi fevralın 5-dək davam edəcək. Kitab sərgisinə 80 ölkədən 1300-dən artıq nəşriyyat qatılıb.
1969-cu ildən keçirilən Qahirə sərgisi Yaxın Şərqin ən böyük kitab sərgilərindəndir. Frankfurt sərgisindən sonra 2006-cı ildə dünyada ən böyük ikinci kitab sərgisi hesab edilib. Ötən il sərgini 5 milyona yaxın insan ziyarət edib.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
