Monteneqroda hökuməti qurmaq keçmiş xarici işlər naziri Miodraq Lekiçə həvalə edilib
Podqoritsa, 30 dekabr, AZƏRTAC
Monteneqroda hökumətin formalaşdırılması Prezident Milo Cukanoviçin daha əvvəl namizədliyini rədd etdiyi keçmiş xarici işlər naziri Miodraq Lekiçə həvalə olunub.
AZƏRTAC xəbər verir ki, Monteneqro Parlamentinin sədri Daniyela Curoviç hökuməti qurmaq mandatının serb partiyalarının namizədi M.Lekiçə verildiyini açıqlayıb. Bildirib ki, sözügedən qərar parlamentdə kifayət qədər dəstəyi olan Baş nazir namizədinin prezident tərəfindən qəbul edilmədiyi təqdirdə səlahiyyətin parlamentə keçməsinə imkan verən yeni qanunvericilik əsasında qəbul olunub.
Monteneqro Prezidenti Milo Cukanoviç deyib ki, M.Lekiçə hökumət qurmaq mandatının verilməsi ilə bağlı yeni təklif konstitusiyaya ziddir: “Mən Monteneqro konstitusiyasına zidd olan qanunun icrasında iştirak etmək niyyətində deyiləm”.
M.Cukanoviç dürüst, prinsipial, əhatəli və demokratik standartlara əsaslanan siyasi dialoqa hər zaman açıq olduğunu bildirib.
Qeyd edək ki, Monteneqroda yeni hökumətin qurulması prosesi siyasi böhrana çevrilib. Milo Cukanoviç parlamentin qəbul etdiyi və hökuməti formalaşdırmaq üçün prezidentin səlahiyyətlərinin məhdudlaşdırılması məqsədi daşıyan qanunu imzalayıb, hökumətin qurulması ilə bağlı müzakirələrdə iştirak etməyəcəyini və namizədin təyin olunması səlahiyyətini parlamentin üzərinə götürəcəyini deyib.
Monteneqroda Baş nazir Dritan Abazoviçin rəhbərlik etdiyi hökumət avqustun 19-da parlamentdə keçirilən etimadsızlıq səsverməsi nəticəsində buraxılıb.
Nihad Budaqov
AZƏRTAC-ın xüsusi müxbiri
Podqoritsa
Bölmənin digər xəbərləri
