MOSKVADA MDB HÖKUMƏT BAŞÇILARI ŞURASININ İCLASI KEÇİRİLMİŞDİR
İclasda MDB ölkələrinin gələcək qarşılıqlı fəaliyyəti ilə bağlı bir sıra sənədlər nəzərdən keçirilmiş və qəbul olunmuşdur. Onların arasında Birlik çərçivəsində 2010-cu ilədək iqtisadi əməkdaşlıq haqqında, MDB orqanlarının gələn il üçün vahid büdcəsi haqqında, ümumi elektroenergetika bazarının yaradılması konsepsiyası, insan alverinə qarşı mübarizə tədbirləri haqqında, avtonəqliyyat oğurluğu ilə mübarizə haqqında və qarşılıqlı maraq doğuran digər sənədlər var.
MDB hökumət başçılarının iştirakı ilə iclasdan sonra keçirilmiş mətbuat konfransında bildirilmişdir ki, qarşılıqlı surətdə faydalı əməkdaşlığı davam etdirmək, Birliyin orqanlarında islahatlar aparılması nəzərə alınmaqla, ölkələr arasında inteqrasiyanı genişləndirmək lazımdır. Qeyd olunmuşdur ki, 2006-cı il MDB ili elan edilmiş, bununla əlaqədar bir sıra tədbirlər keçirilməsi nəzərdə tutulmuşdur. M.Fradkov bildirmişdir ki, Şuranın növbəti iclası gələn ilin mayında Düşənbədə keçiriləcəkdir.
Abbas Abbasov “Azərbaycan görüşün nəticələrini necə qiymətləndirir və ölkəmiz hansı sənədlərə qoşulmamışdır?” sualına cavabında demişdir: ”Azərbaycan bu görüşü çox müsbət qiymətləndirir, çünki hökumət və dövlət başçıları səviyyəsində hər bir görüş ümumi iqtisadi problemlərimiz çərçivəsində yeni meyillər yaradır. Azərbaycan tərəfi 30-dan artıq sənəddən yalnız bir neçəsini imzalamamışdır. Bu, daha çox baza əsası olmayan sənədlərdir. Azərbaycan demək olar ki, bütün iqtisadi məsələlər üzrə bu və ya digər sənədin müzakirəsinə qoşulmuşdur”.
Nazirlər Kabinetinin regionlararası iqtisadi əlaqələr şöbəsinin müdiri, nümayəndə heyətimizin üzvü Kamal İslamzadə AZƏRTAC-ın müxbirinə bildirmişdir ki, Azərbaycan bir çox sənədlərə qoşulmuşdur, lakin onların bəzilərini şərtlərlə imzalamış, bəzilərini isə ölkəmiz üçün baza əsası olmadığından imzalamamışdır. Ölkəmiz “2010-cu ilədək milli istehsalçıların buraxdıqları rəqabət qabiliyyətli məhsulların MDB-nin və ya üçüncü ölkələrin daxili bazarına çıxarılması tədbirləri haqqında” sənədə qoşulmamışdır. “MDB ölkələrinin büdcəsi hesabına maliyyələşdirilən MDB orqanlarının 2006-cı il üçün vahid büdcəsi haqqında” sənədi isə Azərbaycan tərəfi belə bir şərtlə imzalamışdır ki, “Azərbaycan Respublikası Hökumət Başçıları Şurasının MDB ərazisində mütəşəkkil cinayətkarlıq və cinayətkarlığın digər təhlükəli növləri ilə mübarizənin əlaqələndirmə bürosu haqqında 25 noyabr 2005-ci il tarixli Əsasnamə ilə bağlı qərarını imzalamadığı üçün ölkənin nümayəndəsinin təşkilatdakı statusu müəyyənləşdirilməyincə, büronun maliyyələşdirilməsindən imtina edir”.
Azərbaycan tərəfi baza sənədlərinin iştirakçısı olmadığından “MDB ölkələrinin ümumi elektroenergetika bazarının yaradılması konsepsiyası haqqında” sənədi də imzalamamışdır.
Qeyd olunmuşdur ki, Azərbaycan MDB Dövlət İnformasiya Agentlikləri Rəhbərləri Şurasının sədri Vitali İqnatenkonun MDB ölkələri milli informasiya agentliklərinin informasiya mübadiləsi haqqında 18 sentyabr 2003-cü il tarixli sazişin yerinə yetirilməsi barədə hesabatını, MDB Dövlətlərarası Statistika Komitəsi haqqında Əsasnaməyə dəyişikliklər və əlavələr edilməsi haqqında, təbii və texnogen xarakterli fövqəladə hallar üzrə dövlətlərarası Şuranın Nizamnaməsinə dəyişikliklər və əlavələr edilməsi haqqında, MDB Hökumət Başçıları Şurasının növbəti iclasının keçirilməsi haqqında sənədləri imzalamışdır.
K.İsmayılzadə demişdir ki, iclasın gündəliyinə iki əlavə məsələ daxil edilmişdi. “MDB ölkələrinin humanitar əməkdaşlığı haqqında sazişin həyata keçirilməsinin gedişi haqqında” sənədi Azərbaycan əvvəl irəli sürdüyü xüsusi rəy nəzərə alınmaqla imzalamış, “Sərhəd Qoşunları Komandanları Şurasının Əlaqələndirmə Xidmətinin sədri haqqında” sənədi isə imzalamamışdır. Belə ki, Azərbaycan bu Şuranın üzvü deyildir.
Azərbaycan MDB ilinin keçirilməsinə dair tədbirlər planı haqqında qərara öz maliyyə imkanlarını nəzərə alaraq qoşulmuş, habelə MDB ölkələrinin insan alveri ilə mübarizə tədbirləri haqqında sazişini də imzalamışdır. Məhsulların və xidmətlərin keyfiyyəti sahəsində nailiyyətlərə görə MDB mükafatı uğrunda müsabiqə keçirilməsi qərarı, habelə gənclərlə iş sahəsində əməkdaşlıq barədə, əmək miqrasiyası və əməkçi miqrantların sosial müdafiəsi sahəsində əməkdaşlıq haqqında 1996-cı il 16 aprel tarixli, MDB-də avtonəqliyyat vasitələrinin oğurlanması ilə mübarizə və onların qaytarılmasının təmin edilməsi sahəsində əməkdaşlıq haqqında sazişlər dəstəklənmişdir.
Azərbaycan tərəfi İcraiyyə Komitəsi sədrinin müavini haqqında qərarı da imzalamış, 2003-2010-cu illərdə MDB ölkələrinin iqtisadi sahədə qarşılıqlı əlaqələrinin inkişafına və səmərəliliyinin yüksəldilməsinə yönəldilmiş tədbirlərin həyata keçirilməsi planının yerinə yetirilməsinin gedişi haqqında sənədə qoşulmuşdur.
Bölmənin digər xəbərləri
