Moskvada XVI-XVIII əsrlərə aid nadir artefaktlar tapılıb
Bakı, 7 aprel, AZƏRTAC
Moskvada XVI-XVIII əsrlərə aid nadir artefaktlar tapılıb. AZƏRTAC bu barədə Rusiya paytaxtının meri Sergey Sobyaninin “Telegram” kanalına istinadla xəbər verir.
Merin sözlərinə görə, bu antik əşyalar Rusiya paytaxtının tarixinin bir hissəsini əks etdirir və moskvalıların bütöv nəsillərinin adət-ənənələrindən xəbər verir.
Mütəxəssislər XVI əsrin sonu – XVII əsrin əvvəllərinə aid əlvan metaldan hazırlanmış ikitərəfli möhür matrisini tapıblar. Artefakt bir kilsənin yaxınlığında aşkarlanıb. Möhürün bir tərəfində şir, digər tərəfində isə döyüşçü təsviri var.
Sergey Sobyaninin qeyd etdiyi kimi, bunlar orta əsrlərdə məşhur güc və şücaət simvolları idi. O əlavə edib: “Adətən, döyüşçü tam boyda və ya yalnız profildə təsvir edilirdi. Tapılan möhürdə o, beldən yuxarı göstərilir”.
Bundan əlavə, Obıdenski döngələri ərazisində arxeoloqlar XVII əsrə aid bir şir təsviri olan əlvan metal örtük də tapıblar. O dövrdə oxşar əşyalar kəmər və ya çantaları bəzəmək üçün istifadə edilə bilərdi.
Mer daha sonra qeyd edib: “Digər bir tapıntı Çijevski həyətinin ərazisində aşkar edilmiş XVIII əsrə aid Moskva süjetinin təsviridir. Belə plitələr həm qədim rus terrakota plitələrinin təsiri altında yaradılmış, həm də holland üslubunu təqlid etmişdir: ağ fonda “Bibliya”, janr səhnələri və heyvanların təsvirləri olan mavi rəsm var.
Bölmənin digər xəbərləri
