Mütəxəssis: Uşaqlar 18 yaşınadək periodik olaraq 5 dəfə ürək müayinəsindən keçməlidirlər
Bakı, 6 aprel, AZƏRTAC
İnvaziv kardiologiya sinə yarılmadan, bud arteriyası, yaxud boyun venalarından bədənə daxil olmaqla ürək içərisində aparılan əməliyyatdır. Burada söhbət qapalı ürək əməliyyatlarından gedir. Əməliyyat zamanı bıçaqdan istifadə edilmədiyindən bədəndə heç bir kəsik izi qalmır.
AZƏRTAC Azərbaycan Tibb Universitetinə (ATU) istinadla bildirir ki, bunu ATU-nun Tədris Terapevtik Klinikasının invaziv uşaq kardioloqu Elnur İmanov deyib.
Kardioloqun sözlərinə görə, uşaqlarda anadangəlmə ürək qüsurlarının 30-40 faizini qapalı yolla bərpa etmək mümkündür: “Ən sıx rast gəlinən anadangəlmə ürək qüsurlarından biri mədəciklərarası çəpərin qüsurudur. Uşaq mədəciklərarası çəpərdə qüsurla, el dili ilə desək, dəliklə doğulur. Qasıqdan daxil olmaqla və xüsusi bir avadanlıq vasitəsilə həmin dəlik bağlanır. Bununla da problem aradan qaldırılır. Eyni üsulla qulaqcıqlararası çəpər qüsurunu da heç bir kəsik aparmadan, sırf qapalı yollarla bərpa etmək mümkündür. Dəlik xüsusi istehsal olunan, torşəkilli bir avadanlıqla bağlanır. Bu, olduqca bahalı aparatdır. Orqanizm üçün heç bir əks təsiri yoxdur və qanla təmasda olduğu 6 ay müddətində ət toxumasına çevrilir. Qalıcılığı ömürlükdür. Bəzi yalan məlumatlar valideynləri qapalı ürək əməliyyatlarından yayındırır. Lakin bunlar tam yalan məlumatlardır. Əksinə, heç bir kəsik, travma olmadan həyata keçirilən ürək əməliyyatları uşaqlar üçün olduqca effektivdir”.
Mütəxəssis uşaqların dünyaya gələndən 18 yaşınadək periodik olaraq 5 dəfə ürək müayinəsindən keçməli olduğunu deyib: “Bəzi ürək qüsurlarının heç bir şikayət və əlaməti müşahidə edilmir. Ürək qüsurları çəhrayı və göy olmaqla iki cürdür. Uşağın ağız kənarında göyərmə yaranırsa, bunu gözlə görmək mümkündür. Lakin çəhrayı qüsur görünmür və gizli qalır. Onu yalnız müayinə zamanı aşkar edə bilirik. Uşaqlarda əllərin tərləməsi, hərəkət zamanı tez yorulmaq kimi hallar ürək qüsurunun əlamətlərindəndir. Valideyn diqqətli olmalı və bu kimi simptomları müşahidə edərsə, gecikmədən uşaq kardioloquna müraciət etməlidir. Exokardioqrafiyanın (EXO) uşaqlara mənfi təsir edildiyi düşünülür. Hətta valideynlər uşaqlarını ikinci dəfə EXO-ya yönləndirdiyimiz zaman narahat olurlar. Bütün bunlar əsassız məlumatlardır. Ürək xəstəlikləri zamanı müayinə olduqca vacibdir. Məhz bu müayinələr səbəbindən qüsurlar tam aşkar edilir”.
Bölmənin digər xəbərləri
