NARKOTİK MADDƏLƏRİN BECƏRİLDİYİ GİZLİ PLANTASİYA AŞKAR EDİLMİŞDİR

12.04.2004 [14:14]
Çap et
A⁺ A^-

AZƏRTAC-ın xüsusi müxbiri xəbər verir ki, Fransa polisi Əndr departamentinin Val-de-Marn qəsəbəsindən bir qədər kənarda, diqqəti cəlb etməyən yerdə meşə ilə əhatə olunmuş bir binanın 300 kvadratmetrlik zirzəmisində hər mövsümdə min ton məhsul verən narkotik bitkinin becərildiyi gizli plantasiyanı aşkar etmişdir.

Bu işlə məşğul olan 12 nəfərdən ibarət cinayətkar dəstə həbs olunmuşdur. Dəstəyə 54 və 60 yaşlı iki qardaşın rəhbərlik etdiyi aydınlaşdırılmışdır. Böyük qardaş ağır cinayətdə əli olduğuna görə, ötən əsrin 80-ci illərində həbs edilmişdir. İkinci qardaş isə narkotik maddə alveri üstündə ömrünün bir neçə ilini həbsxanada keçirməli olmuşdur. Dəstə üzvləri hər mövsümdə əldə etdikləri hazır məhsulu Mərakeş və İspaniyadakı müştərilərinə ötürürmüşlər.

Cinayətkar dəstənin üzvləri bu işə başlamaq üçün ilk vaxtlar 100000 avro sərmayə qoymuşlar. Narkotik maddənin satışından yaxşı qazanc əldə edən dəstə ümumi razılığa əsasən zirzəminin sahiblərinə ildə 100000 avro kirayə pulu ödəyirmişlər.

Polis həbs edilmiş dəstə üzvləri barədə cinayət işi qaldırmışdır.