Ölkə rəhbəri kimi muxtar respublikaya – bu qədim yurda hər səfəriniz unudulmaz günlər kimi yadda qalır, əhalini daha böyük nailiyyətlərə, quruculuğa, tikib-yaratmağa sövq edir. Əgər Naxçıvana birinci səfərinizdən müasir standartlara cavab verən beynəlxalq hava limanı, hərbi hissənin yeni korpusu və xidmət infrastrukturları, Naxçıvan Dövlət Universitetinin elektron kitabxanası, Azərbaycan Milli Elmlər Akademiyasının Naxçıvan bölməsi üçün yeni institut binası, Əlillərin Bərpa Mərkəzi, Yeyinti sənayesi kompleksi kimi mühüm sosial və müdafiə əhəmiyyətli obyektlər həyata vəsiqə aldısa, ikinci səfəriniz zamanı ulu öndərimizin adını daşıyan məktəbin, Naxçıvan üzgüçülük mərkəzinin, Mülki müdafiə regional mərkəzinin açılışını etdiniz.

Bu qədim yurda yaraşıq verən tikililər, muxtar respublikanın rayonlarında, kənd yerlərində inşa olunan onlarca məktəb, səhiyyə obyekti, emal müəssisələri, əlillər, qaçqın və köçkünlər üçün evlər, inzibati binalar Naxçıvanda Sizin yadigarlarınızdır, davam və inkişaf etdirdiyiniz Heydər Əliyev quruculuq xəttinin bəhrələridir.

Bu gün onların sırasına daha bir vacib obyekt - Naxçıvan Diaqnostika Mərkəzi daxil olur. Cənab Prezident, muxtar respublika sakinlərinin sağlamlığına ən böyük bir töhfə olan bu obyektin tikintisi üçün Sizə naxçıvanlıların sonsuz minnətdarlığını və dərin ehtiramını bildirirəm.

Qurub-yaratmaq, əhalinin qayğısına qalmaq ulu öndərimizin dövlətçilik fəaliyyətinin üstün istiqaməti, idarəetmə fəlsəfəsi idi. Aqillərin belə bir kəlamı var: “Əgər hökmdarlar müdrik olsaydı, bəşəriyyət necə də xoşbəxt olardı”. Azərbaycan xalqı xoşbəxtdir ki, onun belə bir müdrik rəhbəri, ümummilli lideri vardır. Bu gün Azərbaycan əldə etdiyi bütün nailiyyətlərə görə möhtərəm Heydər Əliyevə borcludur. Ulu rəhbərimiz olduqca qısa zaman kəsiyində əsrlərə bərabər işlər gördü. Müstəqil Azərbaycan dövlətini yaratdı, onun inkişafının ən üstün istiqamətlərini müəyyənləşdirdi. Təkcə xalqı xoşbəxt etməyin yolunu göstərmədi, həm də bu yolun əsasını qoydu. Bu, quruculuq yolu Heydər Əliyev yoludur. Xalqımız, dövlətimiz bu yolla gedərək, ölkə rəhbəri hörmətli İlham Əliyevin rəhbərliyi altında bu yolu davam etdirərək, hər gün yeni uğur qazanır, yeniliyə, tərəqqiyə qovuşur. Azərbaycan inkişaf etdikcə, Heydər Əliyevin siyasəti, adı və ənənələri də yaşayır.

Bu unudulmaz gündə bütün uğurlarımızın təminatçısı olan ümummilli liderimizin əziz xatirəsini bir daha yad edirik.

Azərbaycan ümummilli liderimizin şah əsəridir. Bu əsərin son 35 illik tarixini vərəqləsək, aydın görmək mümkündür ki, möhtərəm Heydər Əliyev daim xalqı, onun rifahını düşünmüşdür.

Ümummilli liderimizin Azərbaycana rəhbərliyinin birinci dövründə - ötən əsrin 70-ci illərində həyata keçirilən sosial siyasət xalqın mədəniyyətinin, tarixi ənənələrinin bərpası ilə yanaşı, irimiqyaslı tədbirlərin həyata keçirilməsini, səhiyyə - sağlamlıq müəssisələrinin yaradılmasını da nəzərdə tuturdu. Keçmiş imperiyanın aqrar əlavəsi olan, əhalisi yoxsulluq şəraitində yaşayan, geridə qalmış respublikada bütün bunları həyata keçirmək isə ilk baxışda asan deyildi. Lakin ümummilli liderimizin qətiyyəti, iradəsi nəticəsində Azərbaycan geriliyin daşını atdı, iqtisadiyyatı inkişaf edən, əhalisinin güzəranı yaxşılaşan lider respublikaya çevrildi. Bu dövrdə aparılan məqsədyönlü siyasət nəticəsində ölkə həyatının bir çox sahələri kimi, tibb elmi və səhiyyə də sürətlə inkişaf etdi. Səhiyyə şəbəkəsi genişləndirildi, tibbi kadrların hazırlanması sahəsində mühüm nailiyyətlər qazanıldı. Təkcə Bakıda yox, rayonlarda və ən ucqar kəndlərdə də yeni xəstəxana və dispanserlər, tibb məntəqələri yaradıldı.

1987-ci ildə ümummilli liderimiz siyasi hakimiyyətdən istefa verəndən sonra ölkə həyatında geniş mənada sosial fəlakət başlandı. Müəssisələr, xəstəxanalar dağıdıldı. Əlillərə, veteranlara, ziyalılara münasibət dəyişdi. Ölkəni məhvə aparan bu mənfur siyasətə, dağıdıcı psixologiyaya ümummilli liderimizin ikinci dəfə siyasi hakimiyyətə qayıdışı ilə son qoyuldu. Azərbaycan yenidən öz doğru yoluna - Heydər Əliyev quruculuq xəttinə qayıtdı.

Yeni şəraitdə Azərbaycanın sosial-iqtisadi inkişaf strategiyasını ümummilli liderimiz belə müəyyənləşdirmişdi: “Strateji xəttimiz - sərbəst iqtisadiyyat, özəlləşdirmə və sosial inkişaf yoludur”.

Bu yol bu gün ümummilli liderimizin quruculuq xəttinin davamçısı, ölkə Prezidenti cənab İlham Əliyev tərəfindən uğurla davam etdirilir.

Möhtərəm Heydər Əliyev 2002-ci ildə Naxçıvana səfəri zamanı demişdi: “Mən istəyirəm ki, mənim arzum, istəklərim Azərbaycan dövləti haqqında, müstəqil Azərbaycanın gələcəyi haqqında və Azərbaycanın ayrılmaz hissəsi olan Naxçıvan haqqında planlarım və arzularım yerinə yetirilsin”. Cəmi bir il sonra, 2003-cü ildə Azərbaycan xalqına məşhur Müraciətində ümummilli liderimiz bu planları, arzuları yerinə yetirəcək şəxsiyyətin İlham Əliyev olduğunu bəyan edərək deyirdi: “O, yüksək intellektli və praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir. Mənim axıra çatdıra bilmədiyim taleyüklü məsələləri, planları, işləri İlham Əliyev başa çatdıra biləcəkdir”.

Artıq üçüncü ildir ki, hörmətli Prezidentimiz ümummilli liderimizin ümidlərini şərəflə doğruldur. Xalqın ona olan inam və etimadını doğruldur.

Xalq inamı birdən-birə yaranmır. Bu, konkret işə və nəticəyə söykənir.

Bu inamın kökündə hörmətli İlham müəllimin siyasətçi və millət vəkili kimi Avropa Şurası Parlament Assambleyasındakı gərgin və səmərəli fəaliyyəti, daim ölkəmizin milli maraqlarından çıxış etməsi dayanırdı.

Bu inamın kökündə Milli Olimpiya Komitəsinin Prezidenti kimi gördüyü işlər dayanırdı. Qısa müddətdə görülən tədbirlər nəticəsində Azərbaycan əvvəllər beynəlxalq yarışlara çətinliklə vəsiqə qazanan ölkədən beynəlxalq yarışların keçirildiyi ölkəyə çevrildi. Bakıda və ölkəmizin regionlarında, o cümlədən Naxçıvanda olimpiya idman kompleksləri, üzgüçülük mərkəzləri, digər idman obyektləri tikilib gənclərin sərəncamına verildi.

Bu inamın kökündə Azərbaycan Dövlət Neft Şirkətinin birinci vitse-prezidenti kimi kifayət qədər mürəkkəb bir şəraitdə Azərbaycanın milli və iqtisadi maraqlarına cavab verən neft müqavilələrinin reallaşdırılmağa başlanmasına nail olması dayanırdı.

Bu sahələrdə liderliyə nail olan və onun qorunub saxlanmasını təmin edən möhtərəm Prezidentimiz Azərbaycanın regionda da lider ölkəyə çevrilməsini təmin etmişdir.

Bu, yeni şəraitdə Heydər Əliyev yolunun davam etdirilməsinin ən gözəl nümunəsidir.

Ümummilli liderimizin müəyyənləşdirdiyi quruculuq proqramı bütün sahələrdə, o cümlədən sosial inkişaf sahəsində də davam etdirilir. Ölkə Prezidentinin 2004-cü il 11 fevral tarixli Fərmanı ilə təsdiq olunan regionların sosial-iqtisadi inkişafına dair Dövlət Proqramı iqtisadi inkişafın daha da gücləndirilməsinə yönəldilmiş yeni mərhələnin əsasını qoymuşdur. İqtisadiyyat inkişaf etdikcə, özəlləşdirmə prosesləri dərinləşdikcə, sosial məsələlərə diqqət daha da artır. Bu məsələdə ardıcıl siyasət yeridilməsinin vacibliyini bildirən ölkə Prezidenti demişdir: “Prezident Heydər Əliyevin siyasəti nəticəsində əldə edilmiş uğurlar bizə imkan verir ki, Azərbaycanda ən çətin vəziyyətdə olan xəstələrə, əlillərə böyük qayğı və diqqət göstərək. Bu siyasət bizə imkan verir ki, lazımlı, xəstələrə kömək edəcək müəssisələr tikilsin, istifadəyə verilsin. Azərbaycanda bu siyasət davam edəcəkdir. Buna alternativ ola bilməz”.

Möhtərəm Prezident!

Siz ölkəmizin rayonlarına hər səfərinizdə vacib sosial obyektlərin açılışında və ya təməlqoyma mərasimlərində iştirak edirsiniz, onlara xeyir-dua verirsiniz. 2004-cü ildə Naxçıvana səfəriniz zamanı Sizin tapşırığınızla ayrılmış vəsait hesabına alınmış və Naxçıvan Respublika xəstəxanasında quraşdırılmış Yaponiya istehsalı olan kompüter tomoqrafiya aparatının istifadəyə verilməsi mərasimində iştirakınız bu sahəni şəxsi nəzarətə götürməyinizin əyani ifadəsi idi. Bu gün daha vacib bir obyektin - Naxçıvan Diaqnostika Mərkəzinin təməlinin qoyulmasında iştirak etdiniz. Bütün bunlar əsası ümummilli liderimiz tərəfindən qoyulan xəttin - insanların sağlamlığının qorunması, buna hər cür qayğı göstərilməsi kimi dövlət siyasətinin davam etdirilməsinin nümunəsidir.

Bu, nəinki Naxçıvan Muxtar Respublikasında, hətta ətraf regionlarda da analoqu olmayan bir mərkəz olacaqdır. Naxçıvanda diaqnostika mərkəzinin tikilməsi müayinə üçün başqa ölkələrə müraciət edən xəstələrə muxtar respublika ərazisində yüksək tibbi xidmət göstərilməsinə şərait yaradacaqdır. Bu, blokada şəraitində yaşayan, ölkəmizin əsas ərazisinə gediş-gəliş imkanı məhdud olan muxtar respublika əhalisi üçün çox böyük diqqət və qayğı deməkdir. Bu diqqətə və yüksək dövlət qayğısına görə Sizə bir daha minnətdarlığımızı bildiririk.

X X X

Azərbaycan Prezidenti İlham Əliyev görüşdə nitq söylədi.