Naxçıvanda balıqçılıqda yeni mərhələ - hədəf istehsalı və ixracı artırmaqdır VİDEO
Naxçıvan, 7 iyul, AZƏRTAC
Prezident İlham Əliyevin Sərəncamı ilə təsdiqlənən “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı” ölkədə digər sahələrlə yanaşı, balıqçılıq və akvakultura sektorunun inkişafında yeni mərhələnin əsasını qoyur. Proqramın başlıca məqsədləri istehsalın artırılması, daxili tələbatın daha dolğun ödənilməsi, ixrac potensialının genişləndirilməsi və müasir istehsal modelinin formalaşdırılmasıdır.
Sənəddə balıqçılıq və akvakultura sahəsi üzrə konkret hədəflər müəyyənləşdirilib. Belə ki, 2030-cu ilədək balıq istehsalının 7,7 min tona çatdırılması, ölkənin özünütəminetmə səviyyəsinin yüksəldilməsi və ixrac imkanlarının genişləndirilməsi nəzərdə tutulur. Bu məqsədlərə nail olmaq üçün qanunvericilik bazasının təkmilləşdirilməsi, dövlət dəstəyi mexanizmlərinin formalaşdırılması, subsidiya və güzəştlərin tətbiqi, həmçinin balıqartırma fəaliyyətinin genişləndirilməsi istiqamətində kompleks tədbirlər həyata keçiriləcək.
Proqram çərçivəsində balıqçılıq təsərrüfatlarında müasir texnologiyaların tətbiqi, su resurslarından səmərəli istifadə, istehsal və emal zəncirinin gücləndirilməsi, logistika imkanlarının genişləndirilməsi və rəqəmsal həllərin tətbiqi prioritet istiqamətlər kimi müəyyən edilib. Dövlət Proqramının Naxçıvan Muxtar Respublikasında da uğurlu icrası üçün mühüm tədbirlərin həyata keçirilməsi planlaşdırılır.
Naxçıvan Muxtar Respublikası Kənd Təsərrüfatı Nazirliyinin əməkdaşı Yusif Əlizadə AZƏRTAC-ın bölgə müxbirinə açıqlamasında bildirib ki, Dövlət Proqramında balıq fonduna nəzarət və monitorinq mexanizmlərinin təkmilləşdirilməsi, balıqartırma təsərrüfatlarının istehsal imkanlarının artırılması, eləcə də su hövzələrinə balıq buraxılışının genişləndirilməsi kimi bir sıra mühüm istiqamətlər müəyyənləşdirilib: “Proqram çərçivəsində balıqçılıqla məşğul olan sahibkarlara dövlət dəstəyinin və subsidiyaların göstərilməsi istiqamətində də mühüm tədbirlər həyata keçiriləcək. Hazırda Naxçıvanda balıqçılıq təsərrüfatlarının qeydiyyata alınması istiqamətində müvafiq işlər davam etdirilir”.
Kəngərli rayonunda artıq neçə illərdir ki, iki nümunəvi təsərrüfat - "Asnı" və "Şahtaxtı" forel balıqçılıq təsərrüfatları fəaliyyət göstərir. Şahtaxtı kəndindəki forel təsərrüfatı 2023-cü ildən işə başlayıb. İlk olaraq 2 hovuzla fəaliyyətə başlayan təsərrüfatda hazırda hər birinin su tutumu 90 kubmetr olan 6 hovuz və 3 torpaq gölü mövcuddur.
Təsərrüfatın sahibi Polad Musayev bildirir ki, burada əsasən forel balığı yetişdirilir və istifadə olunan balıq kürüsü Avropa ölkələrindən gətirilir. Hazırda təsərrüfatın illik istehsal gücü 10–12 ton təşkil edir. Yaxın bir ildə bu göstəricinin 20–25 tona çatdırılması planlaşdırılır.
"Şahtaxtı" forel balıqçılıq təsərrüfatının əsas satış bazarı Naxçıvanın daxili bazarları, eləcə də yerli restoranlar, otellər və şadlıq saraylarıdır.
Təsərrüfat sahibi qeyd edir ki, sahənin inkişafı üçün dövlət dəstəyi mühüm əhəmiyyət daşıyır: "Yeni Dövlət Proqramı bizim kimi sahibkarların işinə çox müsbət təsir göstərəcək. Dövlət başçısının cari il mayın 25-də keçirilən müşavirədə səsləndirdiyi statistik göstəricilər də ölkədə balıqçılıq sahəsində istehsalın artırılmasına ehtiyac olduğunu ortaya qoyur. Gözlənilən subsidiya və güzəştli kredit mexanizmlərinin tətbiqi təsərrüfatımızın inkişafına əlavə təkan verəcək”.
Onun sözlərinə görə, təsərrüfatın ən böyük üstünlüyü su mənbəyinin təbii bulaq suyu olmasıdır. Mənbə təsərrüfatdan daha yüksəkdə yerləşdiyinə görə su heç bir elektrik enerjisi sərf olunmadan, təbii axarla hovuzlara daxil olur. Bundan əlavə, suyun temperaturu bütün fəsillərdə sabit qalır. Oksigenlə zəngin olan bu sərin su forel balığının yetişdirilməsi üçün ideal şərait yaradır.
Əminliklə demək olar ki, Dövlət Proqramı çərçivəsində həyata keçiriləcək tədbirlər Naxçıvanda balıqçılıq və akvakultura sahəsinin inkişafında yeni səhifə açacaq. Müasir istehsal texnologiyalarının tətbiqi, dövlət dəstəyi mexanizmlərinin genişləndirilməsi və su ehtiyatlarından səmərəli istifadə sahənin davamlı inkişafına geniş imkanlar yaradacaq. Bu istiqamətdə atılan addımlar yalnız balıq istehsalının həcminin artırılmasına deyil, həm də keyfiyyətli yerli məhsulların bazara çıxarılmasına, yeni məşğulluq imkanlarının formalaşmasına və regionun aqrar potensialının daha dolğun reallaşdırılmasına xidmət edəcək.
Müxbir- Nail Əsgərov
Bölmənin digər xəbərləri
