Nazir: Ötən il işədüzəltmə xidməti vasitəsilə 40 mindən çox vətəndaş işlə təmin olunub
Bakı, 13 yanvar, AZƏRTAC
Əmək və Əhalinin Sosial Müdafiəsi Nazirliyinin bütün fəaliyyəti əhali ilə təmas, xidmət üzərində qurulub. Müxtəlif seqmentlərə nəzər saldıqda bizim ümumi ana siyasi xəttimiz var. Biz çalışırıq ki, aktiv tədbirləri maksimum dərəcədə artıraq. Yəni, passiv ödəniş tədbirləri yox, məhz aktiv tədbirləri. Biz, ilk növbədə, çalışırıq ki, əməkqabiliyyətli hər bir şəxsi əmək münasibətləri və ya məşğulluq xidmətləri çərçivəsində müxtəlif dəstək tədbirləri ilə təchiz edək.
AZƏRTAC xəbər verir ki, bu sözləri əmək və əhalinin sosial müdafiəsi naziri Sahil Babayev AzTV-də çıxışı zamanı deyib.
“Təkcə ötən il yalnız işədüzəltmə xidməti vasitəsilə 40 mindən çox vətəndaşımızı işlə təmin etmişik. Əlavə olaraq 16 min ailə üçün özünüməşğulluq çərçivəsində kiçik və mikro biznes yaratmışıq. Dövlətimizin başçısının təşəbbüsü ilə yaradılan haqqı ödənilən ictimai işlər proqramı çərçivəsində 52 min vətəndaşımız işlə təmin olunub. Cəmi bir il ərzində görülən işlər ümumilikdə 120 min şəxsi əhatə edib”, - deyə nazir qeyd edib.
Bölmənin digər xəbərləri
