İQTİSADİYYAT
Neftin qiymətinin yüksəlməsi enerji ixracatından daha çox gəlir əldə etməyə imkan verir
![Neftin qiymətinin yüksəlməsi enerji ixracatından daha çox gəlir əldə etməyə imkan verir](/files/2023/1/1200x630/16805089272227436721_1200x630.jpg)
Bakı, 3 aprel, AZƏRTAC
Bir sıra OPEC ölkələrinin hasilatın azaldılması ilə bağlı qərarları neftin dünya bazar qiymətində yenidən artımlara səbəb olub. Brent markalı neftin qiyməti 4 faizdən çox yüksələrək bir bareli 84 dollara satılır. Halbuki ötən ayın ortalarında neftin bir barelinin qiyməti 74 dollaradək azalmışdı.
AZƏRTAC xəbər verir ki, bu barədə iqtisadçı-ekspert Vüqar Bayramov deyib.
O bildirib ki, gündəlik hasilatın Səudiyyə Ərəbistanında 500 min, Rusiyada 500 min, İraqda 211 min, Küveytdə 128 min, Qazaxıstanda 78 min, Omanda 40 min, Əlcəzairdə 48 min barel azaldılması planlaşdırılır. Bununla OPEC və tərəfdaşları neft bazarında qiymət stabilliyinə nail olmağa çalışırlar. Bu da artıq bazarda öz təsirini göstərməkdədir.
“Azərbaycan üçün neftin dünya bazar qiyməti ölkəyə daxil olan valyutanın həcmi baxımından əhəmiyyətlidir. Valyuta daxilolmalarının 80 faizi neft və neft məhsullarının payına düşür. Neftin qiymətinin yüksəlməsi enerji ixracatından daha çox gəlir əldə etməyə imkan verir. Ölkəyə daxil olan valyutanın həcmi, eyni zamanda, milli valyutanın məzənnəsinə təsir göstərən faktorlardan hesab olunur. Son qiymət artımlarına rəğmən, ümumi həcmi azaltmadan ixracatda və fiskal gəlirlərimizdə neftin payının azaldılması daha da prioritetləşməkdədir”, - deyə ekspert qeyd edib.