Nərimanov rayonunda 31 mart - Azərbaycanlıların soyqırımı günü ilə bağlı tədbir keçirilmişdir
Bakı, 30 mart (AZƏRTAC). Nərimanov Rayon İcra Hakimiyyətinin və Yeni Azərbaycan Partiyası (YAP) rayon təşkilatının birgə təşkilatçılığı ilə 31 mart - Azərbaycanlıların soyqırımı gününə həsr olunmuş tədbir keçirilmişdir.
Tədbirdə Nərimanov Rayon İcra Hakimiyyətinin rəhbərliyi, YAP rayon təşkilatının üzvləri, tarixçilər, ziyalılar, müəssisələrin, təşkilatların və rayon ictimaiyyətinin nümayəndələri iştirak etmişlər.
Rayon icra hakimiyyətindən AZƏRTAC-a bildirmişlər ki, əvvəlcə tədbir iştirakçıları ümummilli lider Heydər Əliyevin büstü önünə gül dəstələri qoymuşlar.
Tədbiri giriş sözü ilə açan YAP Nərimanov rayon təşkilatının sədri Təmraz Tağıyev 31 mart soyqırımı barədə danışmışdır.
Tədbirdə çıxış edən tarixçilər, ali məktəb müəllimləri, professorlar soyqırımının miqyası və qurbanlarının sayı barədə ətraflı məlumat vermişlər. Xüsusilə vurğulanmışdır ki, təkcə ötən əsrdə Azərbaycanın əhalisi dörd dəfə (1905-1907, 1918-1920, 1948-1953, 1988-1993-cü illərdə) erməni millətçiləri tərəfindən insan hüquqlarının pozulmasına, qeyri-insani rəftarla, insan ləyaqətini alçaldan hərəkətlərlə müşayiət olunan etnik təmizlənməyə və deportasiyaya məruz qalmışdır. Bakı və Gəncə quberniyalarında, Quba, Xaçmaz, Şamaxı, Lənkəran, Muğan qəzalarında və digər bölgələrdə də bu cür qanlı faciələr törədilmişdir.
Mart hadisələri zamanı yüzlərlə şəhərimiz və kəndimiz, o cümlədən Qarabağ ərazisində azərbaycanlıların yaşadıqları 150-dən çox kənd xarabalığa çevrilmiş, Şuşada görünməmiş qırğınlar törədilmişdir. 50 mindən çox soydaşımız, o cümlədən Bakıda 30 minə yaxın azərbaycanlı qətlə yetirilmiş, məscidlər, məktəblər yandırılmış və dağıdılmışdır. Təkcə Zəngəzurda 115, İrəvan quberniyasında isə 211 kənd xarabalığa çevrilmiş, əhalisi qətlə yetirilmişdir.
Nərimanov Rayon İcra Hakimiyyətinin başçısı Abdin Fərzəliyev faciənin nəticələri barədə tədbir iştirakçılarına məlumat vermişdir. Gənc nəslə bu soyqırımı haqqında dolğun məlumatların verilməsinin əhəmiyyətindən danışan Abdin Fərzəliyev bu işdə orta və ali məktəb müəllimlərinin rolunu xüsusilə vurğulamışdır.
Qeyd edilmişdir ki, xalqımıza qarşı həyata keçirilən soyqırımı və deportasiya siyasəti ağır maddi və mənəvi zərbələr vurmuşdur. Lakin uzun illər ərzində bu acı həqiqət dünya ictimaiyyətinə çatdırılmamış və erməni vəhşiliyinə siyasi qiymət verilməmişdir. Yalnız ulu öndər Heydər Əliyevin yenidən hakimiyyətə qayıdışından sonra bu məsələyə prinsipial yanaşma nümayiş etdirilmiş, erməni millətçilərinin xalqımıza qarşı illərlə reallaşdırdıqları soyqırımı və deportasiya siyasətinin mahiyyəti bütünlüklə açıqlanmış və ifşa olunmuşdur. Məhz ümummilli lider Heydər Əliyevin “Azərbaycanlıların soyqırımı haqqında” 26 mart 1998-ci il tarixli Fərmanı ilə xalqımıza qarşı törədilmiş ağır cinayətlərə hüquqi-siyasi qiymət verilmişdir.
Vurğulanmışdır ki, bütün bunlara baxmayaraq, soyqırımı törədənlər cəzasız qalmışlar. 31 mart soyqırımı beynəlxalq səviyyədə hüquqi qiymətini almamışdır. Bu gün Prezident İlham Əliyevin rəhbərliyi altında erməni təcavüzünün nəticələrinin aradan qaldırılması, respublikamızın ərazi bütövlüyünün və suverenliyinin təmin olunması, aparıcı dünya dövlətləri və nüfuzlu beynəlxalq dairələr tərəfindən ölkəmizin ədalətli mövqeyinin etiraf olunması və müdafiəsi istiqamətində ardıcıl və məqsədyönlü işlər görülür.
Bölmənin digər xəbərləri
