Nim Apellyasiya Məhkəməsi: Afrika maskasının satışı qanunidir
Paris, 21 noyabr, AZƏRTAC
Nim Apellyasiya Məhkəməsi noyabrın 20-də diqqətçəkən bir iş üzrə qərar verərək, 150 avroya alınıb sonradan 4,2 milyon avroya satılan Afrika mənşəli maskanın satışının qanuni olduğunu bildirib.
AZƏRTAC xəbər verir ki, bu, bir brokantçının (bit bazarında satıcı) Vigandakı ikinci evini boşaldan yaşlı bir cütlükdən maskanı ucuz qiymətə alması və daha sonra onun həqiqi dəyərini əldə etməsi ilə bağlıdır. Şikayətçilər - Gard bölgəsindən olan səksən yaşlarında ər-arvad - 2022-ci ilin martında Monpelye (Montpellier) şəhərində keçirilmiş hərracın ləğvini tələb edirlər. Onların vəkili Frederik Mansa-Jaffre qərarla razılaşmayaraq bildirib: “Biz kassasiya məhkəməsinə müraciət edəcəyik”. Brokantçının vəkili Patrisia Pijo isə məhkəmənin qərarını məmnuniyyətlə qarşılayıb.
Şikayətçi cütlük isə brokantçının onları aldatmaqda, maskanın əsl dəyərini qəsdən gizlətməkdə ittiham edir. Sözügedən maska XIX əsrə aid, Qabonun Fang xalqının sənətinə məxsus, oyma taxtadan hazırlanmış, son dərəcə nadir bir əsər cütlük tərəfindən sadəcə 150 avroya satılmışdı. Onlar Vigandakı ikinci evlərini boşaltmaq üçün brokantçıdan kömək istəyiblər və maskanın dəyərsiz olduğunu düşünüblər. Brokanteçi isə maskanı araşdırdıqdan sonra onu hərraca çıxarıb 4,2 milyon avroya satıb və bu böyük qiymət fərqi işin mərkəzinə çevrilib.
Apellyasiya məhkəməsinin qərarına baxmayaraq, işin tam bağlanmadığı qeyd olunur: şikayətçilər kassasiya məhkəməsinə gedəcəklərini bəyan ediblər. Bu isə mübahisənin Fransanın ən yüksək məhkəmə instansiyasında davam edəcəyini göstərir.
Bölmənin digər xəbərləri
