Nizami Muzeyində Cavad Heyətin 95 illiyinə həsr olunan videoseminar
Bakı, 9 iyun, AZƏRTAC
AMEA-nın Nizami Gəncəvi adına Milli Azərbaycan Ədəbiyyatı Muzeyinin Elmi şurasının nəzdində daimi “Elmi seminar” fəaliyyət göstərir. Bu seminarda ilboyu muzey əməkdaşları, o cümlədən Gənc Alim və Mütəxəssislər Şurasının üzvləri müxtəlif mövzularda elmi məruzələrlə çıxış edir, müzakirələr aparırlar.
Ədəbiyyat Muzeyindən AZƏRTAC-a bildirilib ki, ənənəvi elm və bilik mübadiləsi vasitəsinə çevrilmiş elmi seminarın növbəti toplantısı videobağlantı vasitəsilə həyata keçirilib. “Qələmi və cərrah bıçağı ilə xalqa xidmət edən Cavad Heyət” adlı növbəti videoseminar cərrah alimin 95 illiyinə həsr olunub.
Muzeyin Qədim və orta əsrlər Azərbaycan ədəbiyyatının tədqiqi və təqdimi şöbəsinin elmi işçisi, Gənc Alim və Mütəxəssislər Şurasının üzvü Nərmin Əliyeva məruzəsində C.Heyətin həyat və yaradıcılığına toxunub, onun təsisçisi olduğu jurnallardan, Məhəmməd Hüseynlə dostluq əlaqələrindən bəhs edib.
Videoseminar C.Heyətin şəxsi fotoları, muzeyin ekspozisiyasında ona aid olan guşədən görüntülər, “Varlıq” jurnalının nömrələrinin, eləcə də alimin müəllifi olduğu kitabların yer aldığı təqdimatın nümayişi ilə davam etdirilib.
Bölmənin digər xəbərləri
