QAN YADDAŞI
NİZAMİ RAYONUNDA ÜMUMXALQ HÜZN GÜNÜ İLƏ BAĞLI SİLSİLƏ TƏDBİRLƏR KEÇİRİLƏCƏKDİR
Bakı, 10 yanvar (AZƏRTAC). Nizami Rayon İcra Hakimiyyətindən (RİH) bildirmişlər ki, 20 Yanvar faciəsinin iyirminci ildönümü ilə bağlı hazırlanmış tədbirlər planına əsasən rayonun bütün idarə, müəssisə və təşkilatlarında mərasimlər təşkil ediləcək, yanvarın 19-da bütün tədris ocaqlarında keçmiş sovet rejiminin bu qanlı terror aktının ifşasına həsr olunmuş xüsusi dərslər keçiləcəkdir.
20 Yanvar əlillərinə və şəhid ailələrinin üzvlərinə humanitar yardım göstəriləcək, şəhidlərin xatirəsinə ehsan süfrələri açılacaq, Keşlə məscidində onların ruhuna dualar oxunacaqdır.
Rayon ərazisindəki xatirə komplekslərində abadlıq işləri görüləcək, iməciliklər keçiriləcəkdir.
Yanvarın 20-də RİH-in və ictimaiyyətin nümayəndələri Şəhidlər xiyabanını ziyarət edəcək, matəm əlaməti olaraq rayon ərazisində Dövlət bayraqları endiriləcək, saat 12.00-da şəhidlərin xatirəsi bir dəqiqəlik sükutla yad olunacaqdır.