Növbəti “Tullantıları hədiyyələrə dəyiş” festivalı Yasamalda keçiriləcək
Bakı, 24 iyul, AZƏRTAC
Növbəti “Tullantıları hədiyyələrə dəyiş” festivalı iyulun 26-da paytaxtın Yasamal rayonu 2-ci Alatava parkı ərazisində keçiriləcək.
Ekologiya və Təbii Sərvətlər Nazirliyinin mətbuat xidmətindən AZƏRTAC-a verilən məlumata görə, nazirliyin təşkilatçılığı, Yasamal Rayon İcra Hakimiyyətinin və bir sıra tərəfdaş təşkilatların dəstəyi ilə təşkil olunacaq tədbir çərçivəsində vətəndaşlar ümumi tutumu minimum 35 litr olan plastik butulka, 5 litr tutumu olan şüşə butulka, banka və ya 10 ədəd işlənmiş batareya təhvil verərək əvəzində müxtəlif hədiyyələr əldə edəcəklər.
Maraqlı interaktiv tədbirlərin də yer alacağı festivalda vətəndaşlar tullantıları gətirərək həm təbiətə töhfə verə, həm də müxtəlif hədiyyələr qazana bilərlər.
Qeyd edək ki, “Tullantıları hədiyyələrə dəyiş” festivalının məqsədi əhalinin tullantıların düzgün idarə olunması ilə bağlı məlumatlandırılması və çeşidləmə vərdişlərinin təşviq olunmasıdır.
Bölmənin digər xəbərləri
