Novruz bayramı astronomik hadisə ilə üst-üstə düşən az sayda əlamətdar günlərdən biridir
Naxçıvan, 19 mart, AZƏRTAC
AMEA Naxçıvan Bölməsinin Batabat Astrofizika Rəsədxanasında keçirilən “Yaz günbərabərliyi”nə həsr olunmuş elmi seminarda bu astronomik hadisədən söhbət açılıb.
Bölmənin mətbuat xidmətindən AZƏRTAC-ın Naxçıvan bürosuna bildirilib ki, rəsədxananın direktoru Qulu Həziyev çıxışında “Yaz günbərabərliyi” astronomik hadisəsi hər il mart ayının 20-si və ya 21-də baş verir. Alim qeyd edib ki, bu hadisə zamanı Yer kürəsinin Günəşə nisbətən mövqeyindən asılı olaraq qütbətrafı ərazilər istisna olmaqla planetimizin bütün bölgələrində gecə ilə gündüzün uzunluğu təqribən bərabər olur. Bu hadisə Yerin şimal yarımkürəsində yaz fəslinin, cənub yarımkürəsində isə payız fəslinin başlanması ilə müşayiət edilir. Bu il bahar Azərbaycana martın 20-də, Bakı vaxtı ilə saat 13:37-də qədəm qoyacaq.
Yazın gəlişinin, təbiətin canlanmasının xalqımız tərəfindən müxtəlif mərasim və bayramlar şəklində qeyd olunduğunu deyən Qulu Həziyev bildirib ki, Novruz bayramının məhz “Yaz günbərabərliyi” günündə qeyd olunması heç də təsadüfi deyil. Bu o deməkdir ki, əcdadlarımızın səma cisimləri, onların hərəkəti və Yer kürəsinə təsiri barədə kifayət qədər məlumatları olub. Dünyada hər hansı bir mühüm astronomik hadisə ilə üst-üstə düşən və bayram kimi qeyd olunan əlamətdar günlərin sayı çox azdır. Bu mənada Novruz bayramı çox qədim köklərə bağlı unikal bir bayramdır.
Daha sonra rəsədxana əməkdaşlarından Vəfa Qafarova və Türkanə Əliyeva “Yerin Günəş ətrafında dolanmasının xüsusiyyətləri” və “Fəsillərin əmələ gəlməsinin astronomik və fiziki əsasları” mövzusunda məruzə ediblər. Məruzələrdə qeyd olunub ki, Yer kürəsinin Günəş ətrafında dolanması dəqiq fiziki və astronomik qanunlarla ifadə olunan dövri prosesdir. Yerin Günəş ətrafında dolanmasının bir tam dövrünü əhatə edən 365 gündə Yer kürəsində dörd fəsil bir-birini əvəz edir. Məhz bu amil Yerdə həyatın mövcud olmasını şərtləndirən əsas amillərdən biridir.
Bölmənin digər xəbərləri
