Nüfuzlu “China Daily” qəzeti bir səhifəsini Azərbaycana həsr edib
Pekin, 25 iyun, AZƏRTAC
Çinin ölkədə və xaricdə çoxsaylı oxucusu olan ingilisdilli “China Daily” qəzetinin 25 iyun nömrəsinin “Tətil-səyahət” səhifəsi bütünlüklə Azərbaycana həsr olunub.
AZƏRTAC xəbər verir ki, Azərbaycana həsr olunan səhifədə ölkəmizin turizm potensialı, mədəniyyəti, adət-ənənələri, coğrafi mövqeyi, gəzməli-görməli yerlərindən söz açılıb.
Qəzetin ölkəmizdə səfərdə olmuş əməkdaşı Ren Çi qeyd edir ki, Avropa və Asiyanın tarixi imperiyalarının irsinə sahib olan "Odlar yurdu" hazırda neftlə zəngin, Formula-1 və futbol üzrə Avropa liqasının oyunlarına ev sahibliyi edən bir ölkədir. Şərqi Avropa və qərbi Asiyanın yolayrıcında, Cənubi Qafqazda, Xəzər dənizinin sahilində yerləşən Azərbaycandakı Azıx mağarası və Quruçay mədəniyyəti, UNESCO-nun Dünya İrsi Siyahısına daxil edilən Qobustan qoruğundakı qaya rəsmləri bu diyarın dünyada ən qədim insan məskənlərindən biri olduğunu təsdiqləyir.
Qeyd olunur ki, Azərbaycan landşaft zənginliyinə malik ölkədir. Turistlər elə paytaxtdan başlayaraq ölkənin cazibəsini hiss edirlər. Bakı həm zəngin mədəniyyətə, həm də beynəlxalq repertuara söykənən tədbirlərin geniş spektrini təklif edən bir çox imkanlara malikdir. Onlar arasında məşhur memar Zaha Hadidin dizayn etdiyi Heydər Əliyev Mərkəzi, habelə Müasir İncəsənət Muzeyi, Milli Tarix Muzeyini və s. göstərmək olar.
Müəllif Azərbaycan Milli Xalça Muzeyi haqqında geniş məlumat verərək qeyd edir ki, bu məkan nadir xüsusiyyətinə görə xarici turistlərin mütləq baş çəkməli olduğu yerlərdən biridir. Binası bükülmüş xalçaya oxşayan muzeydə Azərbaycanın müxtəlif dövrlərə və toxuma texnikalarına aid xalça və digər toxuma nümunələri sərgilənir. Bakının mədəni müxtəlifliyindən söz açan müəllif Azərbaycan paytaxtının həm də coğrafi xüsusiyyətlərinə görə diqqət çəkdiyini yazır. Belə ki, Bakı dəniz səviyyəsindən 28 metr aşağıda yerləşən paytaxt olmaqla yanaşı, həm də dəniz səviyyəsindən aşağıda yerləşən ən böyük şəhərdir. Bakının ən qədim və sakit məhəlləsi olan “Köhnə şəhər” və ya İçərişəhər qum daşından ibarət dar küçələrin labirintidir. Tarixi İpək yolu dövründə İçərişəhər Çin ilə Avropa arasındakı marşrutun əsas nöqtələrindən biri olub.
Jurnalist Ren Çi yazır ki, İçərişəhərdə gəzəndə XII əsrdə inşa edilən binalara toxunarkən, 3 mavi göydələnin ("Alov qüllələri") daxil olduğu şəhərin modern hissəsinin uzaqda olmadığını görürsən. Bəlkə də Bakının ən böyük təzadı ondan ibarətdir ki, siz onun futuristik görməli yerlərinə baxanda əslində onun keçmişinə də nəzər salırsınız.
Məqalədə UNESCO-nun Dünya İrs Siyahısında olan Şəki Xanlarının Sarayından da söz açılıb. Bundan başqa, səhifədə Azərbaycanın şərabçılıq ənənələrindən bəhs edən məqalə də yerləşdirilib.
Qeyd edək ki, ümumilikdə, 100 milyondan çox çap, onlayn, sosial şəbəkələr, mobil cihazlar üçün tətbiqlər üzrə abunəçisi olan “China Daily” təkcə Çində deyil, eləcə də dünyada ingilis dilində nəşr edilən ən populyar qəzetlərdən biridir. Onun xarici ölkələrdəki oxucularının sayı Çindəki oxuculardan çoxdur. Qəzetin Çində buraxılan əsas nəşrinə paralel olaraq, ABŞ-da (Nyu-York), Avropada (London), Afrikada (Nayrobi) və Asiya ölkələri üçün Honkonqda ayrıca versiyaları dərc olunur.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
