OĞUZDA XOCALI SOYQIRIMININ İLDÖNÜMÜ QEYD EDİLMİŞDİR
Tədbirdə rayon icra hakimiyyətinin başçısı Aydın Əlihüseynov xalqımızın tarixinə qanla yazılmış dəhşətli faciədən - insanlığa qarşı ən amansız, kütləvi terror hadisələrindən biri olan Xocalı soyqırımından 17 il keçdiyini, 1992-ci il fevralın 25-dən 26-na keçən gecə Xocalıda baş verənlərin yaddaşımızdan heç vaxt silinməyəcəyini bildirmişdir. Həmin gün erməni daşnakları bütün dünyanın gözü qarşısında Xocalıda soyqırımı hadisəsi törətmiş, heç bir günahı olmayan yüzlərlə dinc insanı qətlə yetirmişlər. Xocalı faciəsinin mahiyyəti və acı nəticələri barədə danışan A.Əlihüseynov, bu qətliamın erməni millətçilərinin Azərbaycan xalqına qarşı yürütdüyü soyqırımı və etnik təmizləmə siyasətinin tərkib hissəsi olduğunu xüsusi vurğulamışdır.
Mərasimdə icra hakimiyyəti başçısının müavini Cumar İsayevin “Xocalı faciəsi tariximizin qanlı səhifəsidir” mövzusunda məruzəsi dinlənilmişdir. Məruzə və çıxışlarda o müdhiş gecədə baş vermiş qanlı hadisələr bir daha xatırlanmış, faciənin müəllifləri, terroru dəstəkləyənlər qətiyyətlə pislənilmişdir. Natiqlər soyqırımı ilə bağlı həqiqətlərin dünya ictimaiyyətinə çatdırılması və Xocalı faciəsinə hüquqi-siyasi qiymət verilməsi istiqamətində ümummilli liderimiz Heydər Əliyevin qətiyyətli addımlarını, onun bütün dünya azərbaycanlılarına etdiyi müraciəti yüksək qiymətləndirmiş, məhz ulu öndərin sarsılmaz iradəsi və müdrik siyasəti nəticəsində Dağlıq Qarabağ problemi, o cümlədən Xocalı faciəsi ətrafında yaradılan informasiya blokadasına son qoyulduğunu xüsusi vurğulamışlar.
Bölmənin digər xəbərləri
