Ölkə başçısının son sərəncamı iki milyona yaxın vətəndaşın sosial rifahına təsir edəcək
Bakı, 11 yanvar, AZƏRTAC
Ölkə başçısının apardığı sosial-iqtisadi siyasətin mərkəzində hər zaman ölkə vətəndaşı dayanır. Əhalinin sosial rifahının gücləndirilməsi istiqamətində daimi tədbirlər həyata keçirilir. Yanvarın 5-də Prezident İlham Əliyevin imzaladığı “Əhalinin sosial rifahının yaxşılaşdırılması sahəsində əlavə tədbirlər haqqında” Sərəncamı aparılan bu siyasətin bariz təzahürüdür. Bununla da ölkəmizdə son beş ildə dördüncü sosial islahat paketinin icrasına başlanılır və yeni ildə yeni sosial islahat mərhələsinə keçid təmin edilir. Sərəncamla minimum əməkhaqqı yanvarın 1-dən 15 faiz artırılaraq 300 manatdan 345 manata çatdırılıb. Bu isə bu il üçün müəyyən olunmuş yaşayış minimumunu 40.2 faiz üstələyir. Dövlət büdcəsindən maliyyələşdirilən sahələrdə çalışan işçilərin aylıq tarif maaşları bir ay müddətində həmin Sərəncama uyğunlaşdırılacaq və vahid tarif cədvəlinin bütün pillələri, yəni 19 pillə üzrə əməkhaqqında artımlar təmin ediləcək.
Bunu AZƏRTAC-a açıqlamasında Milli Məclisin Əmək və sosial siyasət komitəsinin üzvü Sevinc Hüseynova söyləyib.
S.Hüseynovanın sözlərinə görə, əməkhaqqı artımı elm, səhiyyə, sosial təminat mədəniyyət, gənclər və idman, kənd təsərrüfatı, ekologiya, mənzil kommunal, nəqliyyat və rabitə, meliorasiya və su təsərrüfatı, sair müəssislərdə çalışan işçilərə aid olacaq: “Dövlət qulluğunun xüsusi növündə çalışan əməkhaqları vahid tarif cədvəli üzrə ödənilən mülki işçilər, dövlət qulluğunun ümumi növündə yardımçı vəzifələrdə minimum əməkhaqqından aşağı maaş alan dövlət qulluqçuları, dövlət orqanlarında çalışan lakin dövlət qulluqçusu hesab edilməyən xadimə, dalandar, bağbanlar, dövlət büdcəsindən maliyyələşən bir sıra təşkilatlarda aşağı əməkhaqqı alan işçi heyət Sərəncamın əsas hədəf kütləsidir. Ümumilikdə isə minimum əməkhaqqı artımı 700 min nəfəri əhatə edəcək. Həmin şəxslərdən 450 mini dövlət qulluğunda, qalan hissəsi isə özəl sektorda çalışan işçilərdir. Həmin artım üçün büdcədən 440 milyon manatlıq vəsaitin ayrılması nəzərdə tutulur. Sərəncama uyğun olaraq, həmçinin minimum pensiyalar da artırılacaq ki, bunu da Nazirlər Kabineti 10 gün müddətində hazırlayaraq dövlət başçısına təqdim etməlidir. Sərəncamla minimum pensiya 240 manatdan 280 manata çatdırılıb. Bu da minimum pensiyanın məbləğinin 16.7 faiz artırılması deməkdir. Həmin artım 100 minədək pensiyaçını əhatə edəcək. Son dörd ildə sosial sahədə inqilabi islahatların tərkib hissəsi kimi minimum əməkhaqqı 2.7 dəfə artırılaraq 130 manatdan 345 manata, minimum pensiya isə 2.5 dəfə artırılaraq 110 manatdan 280 manata çatdırılıb. Ümumilikdə isə Sərəncamdan irəli gələn artımlar 2 milyona yaxın vətəndaşı əhatə edəcək”.
Bölmənin digər xəbərləri
